[restrict paid="true"]
اټلانټا (پژواک، ۲۴ لړم ۱۴۰۱): هند کې یوڅلوېښتم نړۍوال سوداګریز نندارتون پرانیستل شو چې په کې د افغانستان تولیدات او محصولات هم نندارې ته وړاندې شول.
د هند په پلازمېنه نوي ډیلي کې د افغانستان لوی سفارت له خوا په خپره شوې یوه خبرپاڼه کې راغلي چې یاد نړۍوال نندارتون پرون ماښام (د لړم ۲۳مه) په ډیلي کې د هند سواګریزې ودې ادارې له خوا پرانیستل شو.
د هندوستان په نړۍوال نندارتون کې د افغانستان تولیداتو لپاره هم ځای ځانګړی کېږي.
[caption id="attachment_499217" align="aligncenter" width="501"]
د هندوستان په نړیوال نندارتون کې د افغانستان برخه پرانستل کېږي[/caption]
سرچینې زیاته کړې، دا نړیوال نندارتون چې، هر کال د هند او د نړۍ د بیلابیلو هېوادونو تولیدات او سوداګریز توکي په کې نندارې ته وړاندې کیږي د هند د سوداګرۍ وزیر او د کابیني د یو شمیر غړو لخوا پرانیستل شو.
سرچینې زیاته کړې، دغه نړۍوال نندارتون هر کال جوړېږي او د یو شمېر هېوادونو تولیدات او سوداګریز توکي نندارې ته په کې وړاندې کېږي.
یاد نړۍوال نندارتون له تېرو څو کلونو راهیسې د کرونا احتیاطي تدابیرو له امله ځنډېدلی و او یا یې د فعالیت کچه محدوده شوې وه.
په خبرپاڼه کې راغلي، په هند کې د افغانستان سفارت د سوداګریزې ودې پالیسیو پلې کېدو په ترڅ کې سږ کال په دغه نندارتون کې د افغان سوداګرو لپاره د دې زمینه برابره شوې څو افغاني تولیدات او سوداګریز توکي د خرڅلاو او نړۍوالو مارکېټونو ته د لارموندنې په موخه نندارې ته وړاندې شي.
سرچینې ویلي، په دې افغاني تولیداتو کې د افغانستان د وچې مېوې بېلابېل ډولونه، افغاني غالۍ، زعفران، لاسي صنایع، تازه مېوه، نیمه قیمتي ډبرې او یو شمېر نور توکي په هند کې د مېشتو سوداګرو له خوا په ۲۲ بېلابېلو غرفو کې نندارې وړاندې شوي دي.
یاد نړۍوالو سوداګریز نندارتون به ۱۵ ورځې دوام لري چې د توکو د خرڅلاو ترڅنګ به د هند په بېلابېلو ایالتونو او د نړۍ مختلفو هېوادونو له سوداګرو، تجارتي شرکتونو او تولیدي فابریکو سره د سوداګریزو معاملو او مذاکراتو برخه په ځانګړې توګه په کې په پام کې نیول شوي دي.
د هندوستان په نړۍوال نندارتون کې د افغانستان محصولات
په هند کې د افغانستان سفیر فرید ماموندزي د هند له دولت او سوداګرو مننه کړې چې په خورا حساسو شرایطو کې یې د افغان سوداګرو لپاره نړۍوالو مارکېټونو ته د افغاني تولیداتو او محصولاتو رسولو او نښلولو زمینه برابره کړه.
هغه زیاته کړه، له دې لارې به ګڼ شمېر افغان کروندګرو او کورنیو ته د کار زمینه برابرېږي چې د افغانستان په اقتصادي ثبات کې د پام وړ نقش لري.
[caption id="attachment_499218" align="aligncenter" width="500"]
د هندوستان په نړیوال نندارتون کې د افغانستان محصولات[/caption]
د یادونې ده، هند دا مهال د وچې مېوې په برخه کې ۸۵ سلنه داخلي اړتیا د افغانستان له وچې مېوې پوره کوي او په پرله پسې توګه دا اوولسم کال دی چې افغانستان د یو فعال ګډونوال په توګه په دغه ستر نندارتون کې برخه اخلي.
افغان سفیر زیاته کړه، له هند او د هند له لارې له نړۍ سره د افغانستان تولیداتو او سوداګرو نښلېدو په موخه یې ځانګړې برنامې جوړې کړې چې له نېکه مرغه په تېر یو کال کې غوره لاسته راوړنې لري.
نوموړي همدارنګه وویل، د هند له دولتي مسوولینو او لویو سوداګرو سره پر دې بحث روان دی څو د سیمې په کچه د سترو سوداګریزو او اقتصادي فعالیتونو لپاره د هند او افغانستان هڅې لا همغږې او مشترک اهداف ترلاسه شي.
[/restrict]
