د ښاروالیو لوی ریاست منحل اعلان شو

کابل (پژواک، ۲۷ لړم ۱۴۰۱): د اسلامي امارت د مشر د حکم له مخې، د ښاروالیو لوی ریاست منحل شوی دی.

د تېر حکومت په وخت کې د افغانستان د ۳۴ ولایتونو ښاروالان خپلواک رییسان وو، خو د سیمه‌ییزو ارګانونو تر څارنې لاندې یې فعالیت کاوه.

اسلامي امارت په لومړيو کې د سيمه‌ييزو ارګانونو اداره «د ښارواليو عمومي رياست» په نوم ونوموله.

خو د اسلامي امارت د مشر په نوي حکم کې راغلي، د ولايتونو او ولسوالیو ښاروالۍ دې د اړوندو ولايتونو تر اثر لاندې فعالیت ترسره کړي او له همدې امله د ښاروالیو لوی ریاست دې منحل شي.

په حکم کې زياته شوې، د چارو ادارې لوی ریاست، د کورنيو چارو وزارت، د ماليې وزارت او د ښاروالیو لوی ریاست له استازو څخه دې یو ګډ پلاوی جوړ او د منحل شوي ریاست اړوند تأسیسات، نقلیه وسایط، وسایل او نور تجهیزات دې ثبت، د سوابقو او سندونو له دفترونو سره یو ځای د چارو لوی ریاست ته تسلیم کړي.

په حکم کې دا هم راغلي چې د ښاروالۍ د عمومي ریاست د ۱۴۰۱ کال پاتې بودجه دې د چارو ادارې ته انتقال شي.

ياد حکم د سرپرست حکومت له خوا رسماً نه دی خپور شوی، خو په ټولنيزو رسنيو لاس په لاس کېږي او رسنيو يې هم د همدې حکم له مخې خبرونه خپاره کړي دي.

پژواک ياده موضوع د اسلامي امارت له مرستیال ویندوی بلال کريمي سره شريکه کړه، خو هغه پژواک ته وویل چې په دې اړه معلومات کوي.

دا په داسې حال کې ده چې د سرپرست حکومت واک ته له رسېدو وروسته ځينې دولتي ادارې لغوه او یا هم له نورو ادارو سره مدغم شوې دي.

غړي

You need to subscribe to view the full article. Please login or register a new account.