پلخمري (پژواک، ١١ لېندۍ ١۴٠١): د بغلان ولايت په خنجان ولسوالۍ کې د ترافيکي پېښې له امله د یوه مفتي په ګډون درې کسان مړه شوي او درې نور ټپيان دي.
د سالنګونو د ساتنې مسوول محمديعقوب د لېندۍ په ١١مه پژواک خبري اژانس ته وويل، تېره شپه يو لنډکروزر موټر چې له جنوب څخه شمال خواته روان و، د موټر چلوونکي د بېاحتياطۍ له امله د بغلان د خنجان ولسوالۍ په ملخان سيمه کې له يوه ټريلري موټر سره يې ټکر کړى دى.
هغه وايي چې په دې پېښه کې لنډکروزور موټر سپاره درې کسان مړه شوي او درې نور يې ټپيان شوي دي.
ده وويل چې د سالنګونو د پرسونل او د سيمې خلکو په همکارۍ د پېښې ټپيان د بغلان ولايت مرکزي روغتون ته لېږدول شوي دي.
دغهراز د بغلان د والي وياند مولوي شېراحمد برهاني پژواک ته وويل چې په ياده پېښه کې مفتي سرور هم ژوند له لاسه ورکړی دی.
هغه وايي، مفتي سرور د اسلامي امارت یو فعال غړی و چې دا مهال يې په ارګ کې دنده ترسره کوله.
د يادونې ده، په دې وروستيو کې د بغلان ولايت په مربوطاتو کې ترافيکي پېښې ډېرې شوې دي.
