اماراتو ته د افغان چارواکو، سیاستوالو او نړۍوالو استازو سفرونه او په اړه یي هیله‌مندي

اټلانټا (پژواک، ۱۳ لېندۍ ۱۴۰۱): په داسې حال کې چې یو شمېر افغان سیاستوال او د سرپرست حکومت د دفاع وزیر متحده عربي اماراتو ته رسېدلي، ټاکل شوې چې د امریکا ځانګړی استازی ټام ویسټ هم په نږدې وخت کې د بین‌‌الافغاني تفاهم په موخه دوبۍ ته ورسېږي.

د امریکا د بهرنیو چارو وزارت اعلان کړی چې د افغانستان لپاره یې ځانګړی استازی ټام ویسټ د جاپان، هندوستان او متحده عربي اماراتو پر سفر روان شوی دی.

سرچینې زیاته کړې، نوموړی به په یادو هېوادونو کې له خپلو متحدینو او هلته له مېشتو افغانانو سره د افغانستان پر وروستیو حالاتو خبرې کوي.

ټاکل شوې چې ټام ویسټ سبا (دوشنبه) هندوستان او له هغه ځایه نېغ په نېغه متحده عربي اماراتو ته لاړ شي.

دا په داسې حال کې ده چې د افغانستان پخوانی ولسمشر حامد کرزی له شاوخوا یوه نیم کال وروسته له افغانستان څخه وتلی او پرون متحده عربي اماراتو ته رسېدلی دی.

که څه هم کرزي په خپله د دغه سفر په اړه څه نه دي ویلي، خو د ماليې پخواني وزير او سیاستوال ډاکټر حضرت عمر زاخېلوال – چې له پخواني ولسمشر سره په دغه سفر کې ملتیا کوي – په خپله فېسبوک‌پاڼه کې ليکلي: «وروسته له یوې مودې خوښ یم چې یو ځل بیا له ویاړلي مشر او ګران دوست پخواني ولسمشر ښاغلي حامد کرزي سره هم‌سفری یم، هېواد ته بېرته راتګ به بیا له دې لا ډېر خوندور وي، ډېر ژر د بېرته راتګ په تکل او هیله.»

خو اونۍ وړاندې (د لېندۍ په ۵مه) د پخواني ولسمشر حامد کرزي د مطبوعاتي دفتر مسوول یوسف سها پژواک ته ويلي و، ټاکل شوې چې حامد کرزی د راتلونکې ډسمبر میاشتې په لومړیو کې المان ته سفر وکړي.

بلخوا، د سرپرست حکومت د دفاع وزیر ملا محمدیعقوب هم د یوه پلاوي په مشرۍ پرون متحده عربي اماراتو ته رسېدلی دی.

د ملي دفاع وزارت له خوا په یوه خپره شوې خبرپاڼه کې راغلي، د دغه وزارت سرپرست د سفر موخه، د متحده عربي اماراتو له مشرانو او په دغه هېواد کې له مېشتو افغانانو سره لیده کاته او له خلیجي هېوادونو سره د «اسلامي امارت» د اړیکو پیاوړي کول دي.

بلخوا، هندي رسنیو خبر ورکړی چې د افغانستان لپاره د بریتانیا ځانګړی استازی نېګیل کاسي به هم په روانه اونۍ کې نوي ډیلي ته ورسېږي او له ځایي چارواکو سره به د افغانستان پر ورستیو حالاتو خبرې کوي.

ځینې سرچینې وایي، د بریتانیا ځانګړی استازی هم د منځني ختیځ هېوادونو پر سفر ځي او هلته به د افغانستان په اړه سلا مشورې کوي.

دا په داسې حال کې ده چې د افغانستان پخوانی ولسمشر محمداشرف غني هم په اماراتو کې مېشت دی او ځینو کسانو په ټولنیزو شبکو کې لیکلي چې ښايي ځیني سیاستوال له هغه سره هم لیدنې کتنې ولري خو باوري سرچینو دا خبرې تایید کړې نه دي.

د سیاسي چارو شنونکی واحد فقیري وایي، افغان سیاستوال د دې پر ځای چې له خپلو خلکو سره خبرې اترې وکړي، په پټه په بهرنیو هېوادونو کې لیدنې کتنې کوي.

هغه پژواک ته وویل، اماراتو ته د ملا یعقوب، حامد کرزي، زاخېلوال سفرونه د دې څرګندونه کوي چې افغانان د راټولېدو په حال کې دي.

ده زیاته کړه، څو ورځې مخکې په تاجکستان کې د پخوانيو سیاسیونو، امریکا، اروپایي ټولنې او یو شمېر نورو هېوادونو د استازو ترمنځ ناسته شوې وه.

فقیري پر سرپرست حکومت نیوکه کوي چې له خپلو افغانانو سره د تفاهم لاره نه اخلي او له امله یې اوس د منزوي کېدو په حال کې دی.

بل سیاسي شنونکی قریب‌الرحمن شهاب وایي، دا سفرونه په سیمه کې له چټکو را روانو بدلونونو سره تړلي دي.

هغه پژواک ته وویل، په کور دننه او له ګاونډیانو سره ستونزې مخ پر زیاتېدو دي، په داسې حال کې یو تحرک په هر صورت ښه دی، ګوندې د توپاني وطن بېړۍ یوه ساحل ته وباسي.