<p style="text-align: justify;">ترینکوټ (پژواک، ۲۴ لېندۍ ۱۴۰۱): د اروزګان ولایتي روغتون مسوولین وايي، په دې وروستیو کې یې په داسې حال کې مراجعین او ناروغان ډېر شوي چې د ځای له تنګوالي او د تشکیل له کمښت سره مخ دي.</p>
<p style="text-align: justify;">د دغه روغتون سرطبیب ډاکټر عبدالغفار وطنوال پژواک خبري اژانس ته وویل، وروسته له هغه چې له مرکز ترینکوټ څخه ولسوالیو ته غځېدلې لارې پرانیستل شوې او امنیت ټینګ شوی، نو د دغه روغتون مراجعین هم ډېر شوي دي.</p>
<p style="text-align: justify;">هغه زیاته کړه، دغه ولایتي روغتون د ۵۰ بسترونو لپاره جوړ شوی، خو دوی په کې په یوه وخت له ۱۲۰ ډېر ناروغان بستر کړي دي.</p>
<p style="text-align: justify;">نوموړی وايي، د روغتون تشکیل هم دومره کم دی چې د ۴۰ ناروغانو د پاملرنې لپاره یې یو نرس ګومارلی، په داسې حال کې چې د روغتیايي معیارونو پر بنسټ باید ۵ ناروغانو ته یو نرس وګومارل شي.</p>
<p style="text-align: justify;">خو نوموړي پر یادو ستونزو سربېره یادونه وکړه چې د پخوا په پرتله یې خدمات ۵۰ سلنه ښه کړي او تازه یې د تومور، مثانې او هډوکو درې پرمختللي عملیات په لومړي ځل په بریالۍ توګه ترسره کړي دي.</p>
<p style="text-align: justify;">سرطبیب وویل، په دغه روغتون کې د دوو جراحي ډاکټرانو په مرسته په میاشت کې تر ۱۳۰ لوی او کوچني عملیات کېږي.</p>
<p style="text-align: justify;">هغه غوښتنه وکړه چې مرکزي اداره دې د دغه روغتون د ځای تنګوالي او د تشکیل کمښت ستونزه حل کړي.</p>
<p style="text-align: justify;">د یاد روغتون یوه جراح ډاکټر حبیبالله باوري وايي، په دې وروستیو کې یې په لومړي ځل درې پېچلي عملیات کړي چې مخکې په دغه روغتون کې نه وو شوي.</p>
<p style="text-align: justify;">نوموړي پژواک ته وویل، که مرکزي اداره دغه روغتون ته پام ډېر کړي او د اړتیا وړ امکانات په واک کې ورکړي، نو نورو ولایتونو ته به د ناروغانو د تلو شمېر کم شي.</p>
<p style="text-align: justify;">خلک د یاد روغتون له خدماتو خوښ دي خو دوی هم وايي چې د بسترونو او ډاکټرانو شمېر دې ډېر شي.</p>
<p style="text-align: justify;">د ګیزاب ولسوالۍ اوسېدونکی محمد اغا- چې د تومور عملیات یې په بریالۍ توګه شوي- پژواک اژانس ته وویل، خوشحاله دی چې اوس په دغه روغتون کې دا ډول عملیاتو ته زمینه برابره شوې ده.</p>
<p style="text-align: justify;">خو دی وايي، د روغتون د بسترونو، ډاکټرانو او روغتیاپالانو شمېر کم دی او د دغه ولایت لپاره بسنه نه کوي چې باید ډېر شي.</p>
<p style="text-align: justify;">د اروزګان روغتیايي چارواکي او خلک داسې مهال د ولایتي روغتون اړوند د بسترونو او تشکیل د کمښت یادونه کوي چې موده مخکې دغه ولایت ته د عامې روغتیا وزارت راغلي یوه پلاوي ژمنه کړې وه چې د ولایتي روغتون د ارتقا ترڅنګ به تر ۳۰ پورې نور ساحوي روغتیايي مرکزونه هم جوړ کړي.</p>
