کابل (پژواک، ۲۸ لېندۍ ۱۴۰۱): د ریاستالوزرا اقتصادي معاونیت وایي، د خصوصي شرکتونو د تضمیناتو، تامیناتو او طلباتو څرنګوالی دې ترتیب او اجرا شي.
دغه معاونیت نن په خپله ټویټرپاڼه کې لیکلي چې د ریاستالوزرا اقتصادي مرستیال ملا عبدالغني برادر اخوند په مشرۍ د اقتصادي کمېسیون نوبتي غونډه ترسره شوه.
د اقتصادي کمېسیون په دې غونډه کې د شرکتونو د تضمیناتو، تامیناتو او طلباتو د ورکړې پر څرنګوالي بحث وشو او په اړه یې پرېکړه وشوه.
سرچینې لیکلي، د اقتصادي کمېسیون د شپږمې مصوبې د پرېکړې پر اساس، د ریاستالوزرا اقتصادي معاونیت، مالیې وزارت او د افغانستان بانک له خوا د نورو اړوندو وزارتونو، ادارو او خصوصي سکتور سره په مشوره د خصوصي شرکتونو د تضمیناتو، تامیناتو او طلباتو د استرداد څرنګوالی تایید شوى دی.
سرچینه ليکي چې د کابینې له تایید وروسته دې د مالیې وزارت او د افغانستان بانک له نورو ارګانونو سره په همکارۍ د یادو تضمیناتو، تامیناتو او طلباتو د ورکړې څرنګوالی د ترتیب شوو مادو مطابق اجرا کړي.
په یاده غونډه کې پرېکړه شوې چې د کمال خان بند اړوند د کانالونو پاتې چارې به د ملي پراختیا شرکت له خوا د شوي قرارداد له مخې بشپړيږي او د بند د پاتې کارونو له بشپړېدو وروسته به د ځمکو وېش په اړه هم پرېکړه وشي.
دغهراز په غونډه کې وویل شول، هیڅوک حق نه لري چې د یادو کانالونو اړوند د ځمکو په حساب له چا سره د توزیع معامله وکړي او یا په دې نامه له خلکو څخه پیسې او اسناد راټول کړي.
سرچینه زیاتوي، که چا د کانالونو د ځمکو وېش په نامه له ولس څخه پیسې یا اسناد واخیستل، نو د حکومت له خوا به له جدي او قانوني چلند سره مخ شي.
سرچینې لیکلي، په یاده غونډه کې وویل شول چې د اوبو او انرژۍ وزارت دې له مالیې وزارت سره په ګډه کار وکړي او هغه بندونه دې په ګوته کړي چې بېړني ترمیم ته اړتیا لري.
همدارنګه په یاده غونډه کې د هلمند د زمینداور کانال پروژې په اړه پرېکړه وشوه چې د ریاستالوزرا اقتصادي معاونیت په همغږۍ د کرنې، اوبولګونې او مالدارۍ وزارت په مشرۍ د اوبو او انرژۍ وزارت، کانونو او پټرولیم وزارت، ملي پراختیا شرکت او چاپېریال ساتنې ملي ادارې یوه ګډه تخنیکي کمېټه دې د دغه کانال په اړه یو ځل بیا څېړنې ترسره کړي.
سرچینه زیاتوي، په یاد کانال کې دې د اوبو زېرمو په پام کې نیولو سره د پروژې د امکانسنجۍ او قېمت ټاکنې په ګډون ترسره شوو مطالعاتو ته له سره کتنه وکړي او د خپلو موندنو راپور دې اقتصادي کمېسیون ته وړاندې کړي.
دغهراز په غونډه کې وویل شول چې د هېواد په ګمرکونو کې د درول شوو او نورو نامحصول شوو موټرو د محصول کولو او د ټرانسپورټي ستونزو د حل په موخه دې د ټرانسپورتي چارو تنظیم کمېسیون له خوا د برابر شوي راپور پر اساس جوړه شوې طرحه تطبیق او عملي شي او اړوندې چارې دې د ټاکل شوي پلاوي له خوا تعقیب شي.
غړيYou need to subscribe to view the full article. Please login or register a new account.
