<p style="text-align: justify;">ښرنه (پژواک، ۳۰ لېندۍ ۱۴۰۱): د پکتیکا د سرحوضې ولسوالۍ په لرې سیمه «مارزک» کې یوه روغتیايي مرکز ته د ۳،۵ میلیون افغانیو په لګښت ودانۍ جوړه شوه.</p>
<p style="text-align: justify;">د یاد ولایت د عامې روغتیا رییس ډاکټر حکمتالله عصمت پژواک خبري اژانس ته وویل، د دغه روغتیايي مرکز لپاره د ودانۍ جوړولو چارې دوې میاشتې مخکې پیل شوې وې چې اوس بشپړې شوې او ګټې اخیستنې ته وسپارل شوه.</p>
<p style="text-align: justify;">هغه زیاته کړه: «مارزک د سرحوضې ولسوالۍ لرې سیمه ده چې مخکې یې مجهز روغتیايي مرکز نه درلود، له نننۍ افتتاح وروسته به د دې سیمې خلک له روغتیايي خدماتو برخمن شي او ستونزې به یې هوارې شي.»</p>
<p style="text-align: justify;">په پکتیکا کې د روغتیا ترویج مدیریت ادارې/ OHPM مسوول دورمحمد سعید پژواک خبري اژانس ته وویل، د مارزک روغتیايي مرکز لپاره د ۳.۵ میلیون افغانیو په ارزښت ودانۍ د دې موسسې له لورې جوړه شوې چې نن ورځ ګټې اخیستنې ته وسپارل شوه.</p>
<p style="text-align: justify;">هغه زیاتوي: «یاد روغتیاي مرکز له دې وړاندې SCHC خدمات وړاندې کول چې د سیمې د خلکو ستونزې یې نه شوې هوارولای، خو اوس دا روغتیايي مرکز په CHC+ بدل شوی چې د یادې سیمې د اوسېدونکو ډېرې روغتیايي ستونزې به ورسره هوارې شي.»</p>
<p style="text-align: justify;">د سرحوضې د مارزک سیمې اوسېدونکي تاج محمد پژواک خبري اژانس ته وویل، خوښ دی چې په دې لرې غرنۍ سیمه کې روغتیايي مرکز ته ودانې جوړه شوه او ارتقا یې هم وکړه.</p>
<p style="text-align: justify;">هغه زیاتوي: «مارزک د سرحوضې ولسوالۍ لرې سیمه ده چې مخکې یې اوسېدونکو د روغتیا په برخه کې زیاتې ستونزې درلودې، خو اوس چې روغتیايي مرکز ته ودانۍ جوړه شوې او ارتقا یې هم کړې ده، نو ستونزې به یې حل شي.»</p>
<p style="text-align: justify;">هغه له حکومته د نورو خدمتونو ترڅنګ د دې ولسوالۍ د لارو جوړولو غوښتنه هم لري او وايي، خلک د لارو خرابوالي له امله له یوه ځایه بل ته په ډېر کړاو تګ راتګ کوي.</p>
