لښکرګاه (پژواک، ۴ مرغومی ۱۴۰۱ ): د هلمند د کار او ټولنیزو چارو ریاست وايي چې د دغه ولایت په مرکز لښکرګاه کې بې سرپرسته ماشومانو ته روزنتون جوړ شوی دی.
مسوولین وايي، دغه روزنتون دوه اوونۍ مخکې فعال شوی او تر اوسه ۵۵ ماشومان په کې شامل شوي دي.
د دغه ولایت د کار او ټولنیزو چارو ریاست اړوند د یاد روزنتون امر عصمتالله دراني پژواک ته وویل: «دا دولتي روزنتون دی او د بېسرپرسته او یتیمو ماشومانو لپاره جوړ شوی، هغوی ته د زدهکړو او لیليې زمینه په کې برابره شوې ده.»
نوموړی وایي، په دغه روزنتون کې د ماشومانو ټول مصارف د کار او ټولنیزو چارو وزارت له خوا ورکول کېږي.
دراني زیاته کړه، یاد روزنتون د ۱۰۰ ماشومانو لپاره د لیلیې خدمات په پام کې نیولي او ترڅنګ یې د درس زمینه هم ورته برابره شوې ده.
ده وویل، په هېواد کې شل کلنې جګړې ډېر ماشومان بې سرپرسته کړي او د هغوی والدینو په جګړو کې ژوند له لاسه ورکړی دی.
په یاد روزنتون کې شامل شوي ماشومان خوښ دي چې هم د درس زمینه ورته برابره شوې او هم يې لګښت د حکومت پر غاړه دی.
د عصمتالله په نوم ۱۰ کلن ماشوم چې په دغه روزنتون کې شامل شوی وايي: «پلار مې شهید شوی او زه نور د پالنې څوک نه لرم- خوشاله یم چې حکومت هم د درس زمینه راته برابره کړې او هم زموږ نور لګښتونه پرې کوي.»
د نقیبالله په نوم یو بل ۱۲ کلن ماشوم هم وايي، په تېرو جګړو کې يې والدین له لاسه ورکړي او اوس سرپرست نه لري او ژوند يې له کړاوه ډک دی.
خو ده د یاد روزنتون له جوړېدو خوښي وښوده، ويې ویل، د حکومت له دغه اقدامه هرکلی کوي چې دوی ته يې د لیليې ترڅنګ د درس زمینه هم برابره کړې ده.
د لښکرګاه خلک د دغه روزنتون له جوړېدو او له ښاره د بېسرپرسته ماشومانو له ټولېدو خوښ دي.
د دغه ښار اوسېدونکی مولوي عبداناصر وايي: «په هېواد کې شل کاله جګړه تېره شوې او میلیونونه ماشومان بېسرپرسته شوي او دا د ټولو مسلمانانو، په ځانګړې توګه د حکومت مسوولیت دی چې د دې یتیمانو پالنه وکړي او هغوی ته لاس ورکړي.»
هغه زیاته کړه، د یاد روزنتون جوړېدو لپاره د حکومت اقدام د ستاينې وړ دی چې هم يې یتیمانو ته د درس زمینه برابره کړې او هم يې د لیليې لګښت پر غاړه اخیستی دی.
نوموړي دغه راز وویل: «په هېواد کې د یتیمانو او بېسرپرسته ماشومانو شمېر ډېر زیات دی؛ حکومت دې ټولو ته دا ډول روزنتونونه جوړ کړي.»
د یادونې ده، په هېواد کې د تېرې ۲۰ کلنې جګړې له امله خلکو ته پر مالي زیانونو سربېره، د سر درانه زیانونه هم اوښتي او په میلیونونه کسان بېسرپرسته او زیانمن شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP