ننګرهار کې د ۲،۸ کیلومتره سړک د کانکرېټ کېدو چارې پيل شوې

<p style="text-align: justify;">جلال اباد (پژواک، ۸ مرغومی ۱۴۰۱): د جلال اباد ښاروالۍ مسوولین وايي چې په اومه ناحيه کې د ۱۶،۸  میليونه افغانيو په لګښت، د څه کم درې کیلومترو سړک د کانکرېت کولو چارې پیل شوې.</p>

<p style="text-align: justify;">د جلال اباد ښاروالۍ مرستیال مولوي مومن حمید وویل، د جلال اباد ښاروالۍ اړوند د اوومې ناحیې په غوچکو سیمه کې د جلال اباد ښاروالۍ په مالي لګښت د ۲،۸ کیلومتره په اوږدوالي او ۶ مټره په سور د یو سړک د کانکریټ کولو چارې د یوه خصوصي ساختماني شرکت «خالد احمد ساحل» له لوري پيل شوې.</p>

<p style="text-align: justify;">ده زياته کړه: «د خوښۍ ځای دی چې نن د خپلو ولسونو په منځ کې په داسې یوه ناسته کې ګډون کوم، چې د کالونو راهیسې یې دغه لوی ارمان و، چې دا سړک ورته په اساسي ډول جوړ شي، د شکر ځای دی چې له خپلو داخلي عوایدو څخه یې نن د جوړیدو چارې پيل کوو.»</p>

<p style="text-align: justify;">ده له خلکو وغوښتل چې د دغې پروژې په څارنه او ساتنه کې له ناحیې سره همکاري وکړي.</p>

<p style="text-align: justify;">د تخنیکې او سکتوري چارو رئیس وویل، په دغه سړک باندې ۱۶،۸ میليونه افغانۍ لګښت راځي، چې ټول د جلال اباد ښاروالۍ له داخلي عوایدو ورکول کېږي.</p>

<p style="text-align: justify;">نوموړي وویل، دا ټولې د همدغې ولسونو پیسې دي او بېرته په شفاف ډول ورته د بیارغونې په کارونو لګول کېږي، ترڅو سړکونه، کوڅې، ویالې او لارې جوړې شي او هم هغه خلکو ته د کار کولو زمینه برابره شي، چې کار روزګار یې نشته.</p>

<p style="text-align: justify;">د غونډې په مهال د سیمې خلکو له ښاروال مننه وکړه، چې د دوی غوښتنه یې ومنله او دا سړک یې ورته منظور کړ.</p>

<p style="text-align: justify;">دوی وویل، چې د دغه سړک په پخېدو سره به له ډېرو ستونزو خلاص شي.</p>

<p style="text-align: justify;">د یاد سړک په جوړېدو سره به سلګونه د سیمې اوسېدونکو ته د کار کولو زمینه برابره شي، چې چارې به یې د ۳ میاشتو په موده کې بشپړې شي. په یاد سړک به ۱۶،۸ میلونه افغانۍ لګښت راشي.</p>