یوه ترکي موسسه هلمند کې د دیني او عصري علومو جامعه جوړوي

کابل (پژواک، ۱۵ مرغومی ۱۴۰۱): د ترکیې د یوې خیریه موسسې مشر د ریاست‌الوزرا له اداري مرستیال سره په لیدنه کې ویلي، هوډ لري په هلمند کې یوه جامعه جوړه کړي چې دیني او عصري علوم په کې هم‌مهاله تدریس شي.

د حکومت د رسنیو مرکز په خبرپاڼه کې راغلي چې  د ریاست‌الوزرا اداري مرستیال مولوي عبدالسلام حنفي تېره ورځ د ترکیې هېواد د جمعیت ‌الانهار خیریه موسسې رئيس شیخ عبدالله الحلیلي سره وکتل.

سرچینې لیکلي چې په دغه لیدنه کې د جمعیت الانهار خیریه موسسې مشر ویلي چې دغې موسسې د خپلو خیریه او فرهنګي فعالیتونو په برخه کې تر اوسه دیني مدرسو او دارالایتامونو ته ۴۸ ودانۍ جوړې کړې دي.

شیخ عبدالله الحلیلي ویلي، دا موسسه هو‌‌‌‌‌‌ډ لري چې په هلمند ولایت کې یوه جامعه جوړه کړي چې دیني او عصري علوم په کې هم‌مهاله تدریس شي.

سرچینې په دې اړه نور جزییات نه دي ورکړي.

د ریاست‌الوزرا اداري مرستیال مولوي عبدالسلام حنفي هم په دغه لیدنه کې ویلي، د اسلامي امارت مسسوولین په افغانستان کې د علمي او فرهنګي ودې اړوند پروګرامونو هراړخیز ملاتړ کوي.