کابل (پژواک، ۱۵ مرغومی ۱۴۰۱): د اسلامي امارت ویاند وایي، په کابل او نیمروز کې د داعش درې پټنځایونه له منځه وړل شوي او اته هغه داعشيان وژل شوي او اووه نور ژوندي نیول شوي چې د کابل په وروستیو بریدونو کې یې لاس درلود.
د اسلامي امارت ویاند ذبیحالله مجاهد په خپله ټوېټرپاڼه کې لیکلي، تېره ورځ په کابل او نيمروز ولايتونو کې د داعشیانو پر يوې «مهمه او خطرناکه شبکه» - چې په کابل ښار کې یی په لانګان هوټل (چې چینايي وګړي په کې اوسېدل)، هوايي میدان او د پاکستان پر سفارت او ځینو نورو اهدافو بريدونه تنظيم کړي او سرته رسولي وو- عملیات تر سره شول.
ده لیکلي چې دغو کسانو پر ځینو نورو مهمو اهدافو هم د بريد پلان درلود.
مجاهد زیاتوي: «افغانستان ته يې له خارج څخه بهرني داعشيان هم را انتقالول، پراخ او هماهنګ عملیات وشول، چې په ترڅ کې یې د کابل ښار اتمې حوزې اړوند شهدای صالحین او قلاچه سیمو او د نیمروز ولایت په مرکز زرنج کې درې پټنځایونه په نښه شول.»
هغه لیکلي، د دغو عملیاتو په پایله کې درې واړه پټنځايونه له منځه لاړل، اته داعشیان ووژل شول او اووه نور یې ژوندي ونیول شول چې په وژل شوو کې بهرني داعشیان هم شامل دي.
د نوموړي د معلوماتو له مخې، له دغو کسانو ډېرې سپکې وسلې، لاسي بمونه، ماینونه، چاودېدونکي واسکټونه او توکي هم ترلاسه شوي دي.
هغه وایي چې د دغو عملیاتو پرمهال یو شمېر مشکوک کسان هم د پوښتنو لپاره توقیف شوي شوي.
د روانې مرغومي میاشتې په ۱۱مه د کابل پوځي هوايي ډګر په دروازه کې چاودنه وشوه، د کورنیو چارو وزارت د جزییاتو له ورکولو پرته وویل چې په دغه چاودنه کې یو شمېر کسان ټپیان او یو شمېر نورو خپل ژوند له لاسه ورکړی؛ خو الجزیرې راپور ورکړ چې په دغه چاودنه کې ۱۴ کسانو ژوند له لاسه ورکړی او ۱۸ نور ټپیان وو.
دغهراز د راپورونو له مخې، د روان کال د لېندۍ په ۱۳مه په کابل کې د پاکستان پر سفارت هغه مهال ډزې وشوې چې د پاکستان شارژدافیر عبیدالله نظاماني د سفارت په انګړ کې ګرځېده او په دغه برید کې یې یو ساتونکی ټپي شوی و.
د روان کال د لېندۍ په ۲۱مه په کابل کې د چینایانو پر یوه مېلمستون برید وشو. مجاهد هغه مهال ویلي و چې په یاد برید کې درې بریدګر وژل شوي او یوازې دوه بهرني مېلمانه هغه مهال ټپیان شول چې له لوړ پوړ څخه یې ځانونه وغورځول.
خو د ایمرجنسي روغتون بیا د جزییاتو له ورکولو پرته ویلي و چې په دغه برید کې د درېیو وژل شوو کسانو مړي او ۱۸ ټپیان دغه روغتون ته وروړل شوي دي. د چین بهرنیو چارو وزارت ویلي و چې په دغه برید کې پنځه چینایان ټپیان شوي دي.
غړيYou need to subscribe to view the full article. Please login or register a new account.
