کابل (پژواک، ۲۷ مرغومی ۱۴۰۱): د کابل ښار په اوومه او دولسمه ناحیو کې د څه باندې ۶۵ میلیون افغانیو په لګښت، د سړکونو او کوڅو جوړولو درې پروژې بشپړې او نن د خلکو د تګ راتګ پر مخ پرانیستل شوې.
د کابل ښاروال مولوي عبدالرشید په همدې مناسبت جوړه شوې غونډه کې وویل، د اومې ناحيې په جنګلک سیمه کې د ۱۹۲۸ مترو په اوږدوالي او له ۱۵۰ تر ۶۵۰ سانتيمترو په پراخوالي سره، د لښتیو په ګډون ۲۶ کوڅې او فرعي سړکونه په بنسټیزه توګه د څه باندې ۶ میلیون او ۷۰۰ زره افغانیو په لګښت د ۹ میاشتو په موده کې رغول شوي دي.
ده زياته کړه، دغهراز د دولسمې ناحیې اړوند د نواباد سیمې په ۲۵م ګذر کې، د ۲۵۰۱ مترو په اوږدوالي او بېلابېل پراخوالي لرلو سره یو سړک او د ۱۰۴۳ مترو په اوږدوالي یو کانال د ۲۰،۵ میلیون افغانیو په لګښت جوړ شوي دي.
د هغه په وینا، د احمد شاه بابا مېنې په پنځلسم بلاک کې هم د ۱۲۱۱ مترو په اوږدوالي او ۱۶ مترو په پراخوالي د سړک دواړو څنډو ته د ګلدانونو او پليو لارو په ګډون دوه سړکونه د څه باندې ۳۹ میلیون افغانیو په لګښت د ۹ میاشتو په موده کې جوړ شوي دي.
د کابل ښاروال وايي، د لنډ مهاله، منځمهاله او اوږدمهاله پلانونو په پلي کولو سره، اوسمهال د کابل ښار معیاري او تلپاتې ودې ته زمینه برابره شوې ده. په راتلونکي نوي کال کې به د ډېر شمېر خامه سړکونو او کوڅو جوړولو په اړه ګامونه پورته شي.
نوموړي له ښاریانو وغوښتل چې د سړکونو، کوڅو او نورو تاسیساتو په ساتنه کې دې د کابل ښاروالۍ ملتیا وکړي.
د اوومې ناحیې د جنګلک سیمې یوه اوسېدونکي عطاءالله فیضاني پژواک ته وویل، له دې مخکې د دغې سیمې خلک له بېلابېلو ستونزو سره مخامخ وو، خو اوس د کوڅو په پخولو سره به د تګ راتګ برخه کې د خلکو ستونزې حل شي.
هغه د سیمې له اوسېدونکو وغوښتل چې د یادو جوړو شوو ځایونو په ساتنه کې خپل مسوولیت ادا کړي.
محمد عثمان چې د کابل ښار د دولسمې ناحیې اوسېدونکی دی، وایي: «موږ ډېر خوشحاله یو چې دغه کوڅې جوړې شوې، ځکه مخکې د دغې سیمې خلک به له ستونزو سره مخامخ وو، نو اوس چې دغه کوڅې جوړې شوې، د خلکو ستونزې به ورسره حل شي او له ښاروالۍ هم غواړو چې دا ډول کوڅې لا ډېرې جوړې کړي.»
د کابل ښاروالۍ د معلوماتو پر بنسټ، د یادو کوڅو او سړکونو په جوړېدو سره به پر ترانسپورټي اسانتیاوو رامنځته کېدو سربېره، د چاپېریال ساتنې په برخه کې هم د پام وړ بدلون راشي او ورسره به د سیمې د اوسېدونکو موسمي ستونزې هم حل شي.
غړيYou need to subscribe to view the full article. Please login or register a new account.
