کابل (پژواک، ۲ سلواغه ۱۴۰۱): د «اسلامي امارت» د مشر د فرمان پر اساس، د اوبو او انرژۍ وزارت د انرژۍ معینیت مخکینی مرستیال ملا محمد عیسی ثاني د ټولګټو وزارت د سرپرست په توګه وټاکل شو او خپله دنده یې پیل کړه.
نن د نوموړي د پېژندګلوۍ په موخه ټولګټو وزارت کې غونډه جوړه شوې وه چې د چارو ادارې مشر نورالحق انور ترڅنګ، د دغه وزارت تخنیکي مرستیال مولوي عبدالکریم فاتح، حقوقي سلاکار مولوي آغا جان، ویاند حمیدالله مصباح او نورو مسوولینو ګډون کړی وو.
د ټولګټو وزارت حقوقي سلاکار مولوي آغا جان وویل، د «اسلامي امارت» د مشرتابه شېخ هبةالله اخوندزاده د فرمان پر اساس، د اوبو او انرژۍ وزارت د انرژۍ معینیت مخکینی مرستیال ملا محمد عیسی ثاني د ټولګټو وزارت د نوي سرپرست په توګه وټاکل شو.
نوموړي د وزارت نوي سرپرست ته په چارو کې د بریا غوښتنه وکړه.
هغه د وزارت له اړوند رییسانو وغوښتل چې د تېر په څېر له نوي سرپرست سره همکاري وکړي.
د ټولګټو وزارت نوي سرپرست ملا محمد عیسی ثاني وویل، د مخکیني سرپرست ټول پلانونه ورته د منلو وړ دي او له هغه نور پاتې کارونه به پر مخ یوسي.
نوموړي زیاته کړه، د وزارت په کارکوونکو کې به کوم بدلون رانه شي او ژمنه یې وکړه چې په دې اداره کې به څوک د خپلویو او واسطې پر بنسټ و نه ګوماري.
د یادونې ده، له دې مخکې عبدالمنان عمري د یاد وزارت د سرپرست په توګه دنده ترسره کوله.
Views: 100
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن