کابل (پژواک، ۲۱ سلواغه ۱۴۰۱): د افغانستان د بهرنیو چارو وزارت سرپرست د ترکیې له بهرنیو چارو وزیر سره په ټېلیفوني اړیکه کې ویلي، که ترکیه وغواړي افغانستان به د ژغورنې او بېړنۍ روغتيايي پاملرنې ټیمونه ور واستوي.
د افغانستان د بهرنیو چارو وزارت مرستیال ویاند حافظ ضیااحمد تکل نن (د سلواغې ۲۱مه) په خپله ټویټرپاڼه کې لیکلي، د افغانستان اسلامي امارت د بهرنیو چارو وزیر مولوي امیرخان متقي له خپل ترکي سيال مولود چاووش اوغلو سره په ترکیه کې د وروستۍ ويجاړوونکې زلزلې د ځاني او مالي تلفاتو په اړه ټېليفوني خبرې وکړې.
سرچینې لیکلي: «په پيل کې مولوي امیرخان متقي د ترکیې د بهرنیو چارو وزير مولود چاووش اوغلو ته د افغان حکومت او ولس په استازیتوب د ترکيې له حکومت او ولس سره يو ځل بيا خپله ژوره خواشیني څرګنده کړه او له خپلو مسلمانو ترکي وروڼو او خوېندو سره یې په دغه ستره غمیزه کې ځان شریک وباله.»
سرچینه زیاتوي، متقي څرګنده کړه چې د افغانستان اسلامي امارت له خپلو ترکي وروڼو سره د خپلو امکاناتو په محدوده کې مرسته اعلان کړه.
سرچینې د متقي له قوله لیکلي: «که ترکيه غوښتنه وکړي، نو زموږ د ژغورنې او د بېړنۍ روغتيايي پاملرنې ټیمونه هم د مرستې او ژغورنې لپاره چمتو دي.»
دغهراز متقي وویل، په انقره کې افغان سفارت هم زلزلهځپلې سیمې ته د مرستې لپاره یو ټیم استولی دی.
د سرچینې د معلوماتو له مخې، د ترکيې د بهرنيو چارو وزير د افغانستان له مرستې د مننې ترڅنګ زیاته کړه چې افغانان او ترکان د تاريخ په اوږدو کې يو له بل سره همکار پاتې شوي دي.
سرچینه کاږي، د ترکیې د بهرنیو چارو وزير ويلي چې وروستۍ زلزلې د دغه هېواد په ۱۰ ولایتونو کې شاوخوا ۱۳ میلیونه وګړي زیانمن کړي او دا يې د ترکيې په تاریخ کې تر ټولو ستره او سخته زلزله بللې ده.
د تېرې دوشنبې سهار دوو پرلهپسې سختو زلزلو د ترکیې سوېلختیځ او د سوریې لوېدیځې سیمې ولړزولې.
د امریکا د ځمکپېژندنې ادارې د معلوماتو له مخې، د لومړۍ زلزلې شدت د ریښتر په کچه ۷.۸ او د دویمې یې ۷.۵ درجې وه.
د ترکیې حکومت ویلي، تر اوسه د زلزلې له امله له ۱۶ زرو ډېر کسان مړه او شاوخوا ۶۵ زره نور ټپیان شوي دي.
دغه راز په سوریه کې هم پنځه زره کسان مړه او زرګونه نور ژوبل شوي دي.
د یادونې ده، د افغانستان د بهرنیو چارو وزارت د سلواغې په ۱۸مه د ترکيې له زلزلهځپلو سره د ۱۰ میليون افغانیو او د سوريې له زلزلهځپلو سره د پنځه ميليون افغانیو مرسته اعلان کړې وه.
غړيYou need to subscribe to view the full article. Please login or register a new account.
