د افغانستان سفارت د ترکیې په زلزله کې د ۸۰ افغانانو مړینه تایید کړه

[restrict paid=”true”]

اټلانتا (پژواک، ۲۱ سلواغه ۱۴۰۱): په ترکیه کې د افغانستان سفارت په دغه هېواد کې د زلزلې له امله د ۸۰ افغانانو مړینه تایید کړې ده.

د تېرې دوشنبې په سهار دوو پرله‌پسې سختو زلزلو د ترکیې سوېل‌ختیځ او د سوریې لوېدیځې سیمې ولړزولې. د امریکا متحدو ایالتونو د ځمک‌پېژندنې ادارې د معلوماتو له مخې، د لومړۍ زلزلې شدت د ریښتر په کچه ۷.۸ او د دویمې یې ۷.۵ درجې وه.

د ځایي چارواکو د معلوماتو له مخې، یادو زلزلو د دغه هېواد لس ولایتونه سخت ځپلي او درانه مالي او ځاني زیانونه یې اړولي دي.

په انقره کې د افغانستان مرستیال سفیر محمد مصدق فقیري د سلواغې په ۲۱مه پژواک اژانس ته وویل، له بده‌مرغه په زلزله کې ۸۰ افغانان هم مړه شوي دي.

هغه زیاته کړه چې مړه شوي افغانان همالته د ځایي اوسېدونکو په مرسته خاورو ته سپارل شوي دي.

فقیری وایي، د سفارت د ډيپلوماتانو، مدني ټولنو او عامو افغانانو په ګډون یو پلاوی د زلزلې سیمو ته استول شوی، څو د افغانانو په اړه کره او دقیق معلومات راټول کړي.

نوموړي وویل چې د کام‌ایر هوایي شرکت ۵۰ زره ډالر مرسته کړې چې د سفارت له خوا به هلته پر افغانانو ووېشل شي.

د ترکیې انادولو اژانس  د دغه هېواد د ولسمشر رجب طیب اردوغان په حواله خبر ورکړی چې په ترکیه کې د وروستۍ زلزلې له امله ۱۹ زره کسان مړه او له ۷۰ زره ډېر نور ژوبل شوي دي.

انادولو اژانس دغه‌راز د سوریې حکومتي چارواکو په حواله خبر ورکړی چې هلته د زلزلې له امله ۳۵۰۰ کسان مړه او له ۵۰۰۰ ډېر ژوبل شوي دي.

[/restrict]