کابل (پژواک، ۲۳ سلواغه ۱۴۰۱): د روان کال په ژمي کې په هېواد کې کمسارې يخنۍ د لسګونو کسانو ژوند واخیست او زرګونه څاروي يې هم له منځه یووړل؛ عبدالسلام او عبدالباقي په بادغيس ولايت کې د دغې یخنۍ دوه قربانيان دي چې کورنۍ يې د سختې بېوزلۍ او سږنۍ يخنۍ کیسه کوي.
سږ کال د سړې هوا څپې پر ټول افغانستان خپرې وې او بادغیس ولایت هم ترې په امن پاتې نه شو؛ په بادغیس کې د سیمهییزو چارواکو د شمېرو له مخې، په دغه ولایت کې د یخنۍ له امله ۱۹ کسان مړه شوي او څه باندې ۲۶ زره څاروي هم له منځه تللي دي.
د پژواک سيمهييز خبريال د روان ژمي د قربانيانو او زیانمنو د وضعيت په اړه د راپور چمتو کولو په موخه قادس ولسوالۍ ته تللى او له يو شمېر اوسېدونکو سره يې خبرې کړې دي.
د قادس ولسوالۍ د «زاد صالح» کلي اوسېدونکی ۷۰ کلن عبدالباقي د شپې له خوا هغه مهال له کوره وځي چې د حرارت درجه د سانتي ګراد په کچه منفي ۲۶ وه او د همدې سړې هوا له امله یې یخ وهي.
د عبدالباقي مېرمنې تازهګل له پژواک خبري اژانس سره په مرکه کې وويل، کله چې د شپې نیمايي کې له خوبه راويښېږي او لیدلي یې چې خاوند یې نشته، له کوره بهر وتلې او د خپل خاوند له نيمژاوندى جسد سره مخ شوې ده.
د تازهګل په خبره، خاوند یې له بېوزلۍ ځورېده او د کور ګرمولو لپاره یې هم څه نه درلودل.
د عبدالباقي کشر ورور نظامالدین هم دغه جریان داسې بیان کړ، کله یې چې وریندار له ده سره په اړیکه کې شوه، ځان یې د هغې کور ته ورساوه او عبدالباقي یې ډاکتر ته روان کړ.
د نظامالدين په وينا، عبدالباقي یخ وهلی و او ډاکتر ته د لېږد پر مهال یې په لاره کې ژوند له لاسه ورکړ.
هغه زیاتوي، ورور یې دومره غریب و چې ان د کور ګرمولو لپاره د خپلو جامو سوځولو ته هم اړ شوی و.
د عبدالباقي ۱۰ کلنه لور مزين چې خپل پلار پسې ډېره خواشینې وه او هره شېبه يې هغه يادوه ویې ویل، پلار يې سره له دې چې له بېوزلۍ ځورېده، خو هغه یې په ښوونځي او مدرسه کې شامله کړې وه.
دا یوازې عبدالباقي نه دی چې د سړې هوا قرباني شو، ۵۰ کلن عبدالسلام چې هغه هم د همدې ولسوالۍ اوسېدونکی دی دغه یخنۍ ترې ژوند واخیست.
د عبدالسلام زوی عبدالله وايي، پلار یې د هرات ولایت په یوه بڼ کې بڼوال و، کله چې یې غوښتل له بادغیس نه هرات ته ولاړ شي، په لاره کې یخ وواهه او مړ شو.
د عبدالله په خبره، که څه هم ده او کورنۍ يې د پلار د تلو مخالفت وکړ، خو بېوزلۍ او ناچارۍ هغه اړ کړ چې په دې سړه هوا کې هم خپل کار ته لاړ شي.
هغه زياته کړه، بېکاري او بېوزلي د دې لامل شو چې پلار يې په دې سړه ورځ کې هم د يوې مړۍ ډوډۍ موندلو پسې بل ولايت ته ولاړ شي.
د عبدالسلام مېرمن عيديماه وايي، اوس چې خاوند یې مړ شوی، د خوړلو لپاره څه نه لري او تر اوسه ورسره هیڅ مرسته نه ده شوې.
که څه هم د عبدالسلام او عبدالباقي کورنۍ د حکومت او مرستندويه بنسټونو د نه پاملرنې خبره کوي؛ خو د بادغيس ولايت د طبيعي پېښو پر وړاندې د مبارزې رياست سرپرست مولوي باريداد صابر وايي، د دې پېښې له قربانيانو سره نغدي او غېرنغدي مرستې شوې دي.
د طبیعي پېښو پر وړاندې د مبارزې ریاست سرپرست په یاد ولایت کې د مړو شمېر ۱۹ کسان وښود او زیاته یې کړه، ۷ کورنۍ یې له نږدې لیدلې چې مرسته ورسره شوې او له پاتې نورو زیانمنو سره هم د مرستو پروګرام لري.
د بادغیس د طبیعي پېښو پر وړاندې د مبارزې ریاست د شمېرو له مخې، د دغه ولایت په یو شمېر ولسوالیو کې د انساني تلفاتو ترڅنګ، څه باندې ۲۶ زره څاروي هم له منځه تللي دي.
دا په داسې حال کې ده چې د روان کال په ژمي کې د هېواد له بېلابېلو ولايتونو د يخنۍ له امله د انسانانو او څارویو د تلفاتو راپورونه خپاره شوي دي.
له طبیعي پېښو سره د مبارزې وزارت د وروستیو شمېرو له مخې چې څو ورځې مخکې یې خپرې کړې، په افغانستان کې د ژمي سړې هوا له امله د مړو شمېر ۱۶۶ کسانو ته رسېدلی او سخت مالي زیانونه یې هم اړولي دي.
Visits: 8
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن