افغاني سرې مياشتې د ترکيې له زلزله‌ځپلو سره د ۴،۵ ميليون افغانيو مرسته وکړه

کابل (پژواک، ٢۴ سلواغه ١۴٠١): د افغاني سرې مياشتې مسوولين وايي چې دغې ادارې د ترکيې هېواد له زلزله‌‌ځپلو سره د ٤،٥ ميليون افغانيو مرسته وکړه.

دغه څرګندونې په هغه خبرپاڼه کې شوې چې د افغاني سرې مياشتې له مطبوعاتي دفتره پژواک خبري اژانس ته را لېږل شوې ده.

سرچينه وايي، د افغاني سرې میاشتې عمومي ريیس مولوي مطیع‌الحق خالص د ۴ اعشاریه ۵ میلیون افغانیو دغه مرسته په کابل کې د ترکیې سفیر جیهاد ارګینای ته وسپارله.

خالص وويل چې افغاني سره میاشت اداره د ترکیې له ولس سره څنګ په څنګ ولاړه ده او په دغه ستر غم کې د ترکیې له ولس سره ځان شريک بولي.

نوموړي زياته کړه: «ترکیه د افغانستان خواخوږی او دوست هېواد دی چې تل یې په سختیو کې افغان ولس ته د مرستې او خواخوږۍ لاس ورکړی دى.»

دغه‌راز په کابل کې د ترکیې سفیر جیهاد ارګینای د افغاني سرې میاشتې له دغې مرستې مننه وکړه او ويې ويل، یاده مرسته به تر زلزله‌ځپلو کورنیو په سالمه توګه ورسوي.

دا په داسې حال کې ده چې تر دې وړاندې افغان حکومت هم د ترکيې له زلزله‌ځپلو سره د لس ميليون او د سوريې له زلزله‌ځپلو سره د پنځه ميليون افغانيو مرستې اعلان کړى و.

د تېرې دوشنبې په ورځ (د سلواغې ۱۶مه)  د ترکیې په وخت سهار ۴ بجې او ۱۷ دقیقې دوو پرله‌پسې سختو زلزلو د ترکیې سوېل‌ختیځ او د سوریې لوېدیځې سیمې ولړزولې.

د امریکا متحده ایالتونو د ځمک‌پېژندنې ادارې د معلوماتو له مخې، د لومړۍ زلزلې شدت د ریښتر په کچه ۷.۸ او د دویمې یې ۷.۵ درجې وه.

د ترکيې ځایي چارواکو د معلوماتو له مخې، یادو زلزلو د دغه هېواد لس ولایتونه سخت ځپلي او درانه مالي او ځاني زیانونه یې اړولي دي.

د راپورونو پر بنسټ، په ترکیه او سوریه کې د وروستیو زلزلو له امله د مړو شمېر نږدې ۳۵ زره او د ټپیانو شاوخوا ۹۰ زره کسانو ته رسېدلی دی.