کندهار (پژواک، ۲۹ سلواغه ۱۴۰۱): په کندهار کې د تخنیکي او مسلکي زدهکړو انسټيټیوټ مسوولین وایي، د ملکي او نظامي بنسټونو اداري کارکوونکي په مسلکي ډول روزي او تر اوسه په دغه برخه کې ۴۸۰ کسان روزل شوي دي.
د دې لړۍ په دوام نن (شنبه) هغه ۱۲۰ فارغانو ته په کندهار پوهنتون کې د یوې غونډې په ترڅ کې فراغتلیکونه ورکړل شول چې دوه میاشتې په انګلیسي، کمپیوټر او نورو اداري برخو کې روزل شوي وو.
د کندهار د تخنیکي او مسلکي زدهکړو امریت اجرایه مدیر قاري حذیر صدیقي وایي، د اسلامي امارت له راتګ وروسته دا درېیمه دوره ده چې اداري کارکوونکي په مسلکي برخه کې روزنه ترلاسه کوي.
هغه زیاته کړه: «مخکې په اکثره ادارو کې اداري کارکوونکي مسلکي نه وو چې کارونه به نیمګړي وو، خو اوس د هغوی د مسلکیتوب لړۍ پيل شوې ده، په ملکي او نظامي ادارو کې ټولو اداري کارکوونکو ته د هغوی له مسلک سره سم نظري او عملي زدهکړې ورکول کېږي.»
فارغ طالبان هم وایي، په دوه میاشتنۍ روزنه کې یې ډېر هغه څه زده کړي چې مخکې پرې نه پوهېدل.
د څلورمې حوزې جنايي مدیر حافظ خالقداد الماس وایي، په تېرو دوو میاشتو کې یې د جنايي جرمونو اړوند برخو کې ښه روزنه ترلاسه کړې او دا به له ده سره د دندې پر مهال ښه مرسته وکړي.
هغه زیاته کړه: «موږ په دوه میاشتو کې د پلان جوړونې او نورو اداري کارونو په اړه ښې زدهکړې وکړې، تر مخه په هغه څه نه پوهېدلو چې په دا دوه میاشتو کې زموږ د استادانو له خوا راته وویل شول.»
قاري بشیراحمد بیا په یوه بله اداره کې د معتمد په توګه دنده ترسره کوي او وايي، مخکې يې د حسابدارۍ، مکتوب لیکلو او نورو برخو کې ستونزې لرلې خو اوس یې هغه څه زده کړي چې د دندې پر مهال یې ورته اړتیا وه.
نوموړي وویل: «زه تر مخه نظامي وم بیا معتمد شوم، نو په کار کې مې یو څه مشکلات درلودل خو اوس چې مې دوه میاشتې زدهکړې وکړې، ډېر شیان مې زده کړل او انشاءالله مشکل به نه وي.»
دغه کسان داسې مهال فارغېږي چې د کندهار ډېر اوسېدونکي په ادارو کې د غیرمسلکي کسانو له شتوالي شکایت کوي.
دوی وایي، په دغه ولایت کې ډېری هغه مسلکي کسان چې تر لیسانس او ماسټرۍ پورې یې په بېلابېلو برخو کې زدهکړې ترسره کړې، بېروزګاره دي نو باید هغوی ته د کار موقع ورکړل شي.
غړيYou need to subscribe to view the full article. Please login or register a new account.
