[restrict paid="true"]
<p style="text-align: justify;">اټلانټا (پژواک، د کب لومړۍ نېټه ۱۴۰۱): د کرکټ نړۍوالې شورا د متحده عربي اماراتو کرکټ ملي لوبډله د وخت ضایع کولو او لوبغاړی یې فرید زیور د افغان لوبغاړي ګلبدین نایب پر وړاندې د ناسم چلند له امله جریمه کړي دي.</p>
<p style="text-align: justify;">د افغانستان او متحده عربي اماراتو ترمنځ د کرکټ د درېیو شل اوریزو نړۍوالو لوبو لړۍ پرون دوه پر یوه لوبو د افغانستان په بریا پای ته ورسېده.</p>
<p style="text-align: justify;">د کرکټ نړۍوالې شورا (ایسيسي) د کب په لومړۍ نېټه په یوه خپره شوې خبرپاڼه کې ویلي، د اماراتو لوبډلې له افغانستان سره د یکشنبې په ورځ د وروستۍ لوبې پر مهال په ټاکلي وخت کې اورونه نه دي کړي.</p>
<p style="text-align: justify;">د کرکټ لوبو د اصولو له مخې، د لوبې هر پړاو ځانګړی وخت لري چې باید لوبډلې همدغه مشخص خپل نوبت په پام کې ونیسي او که سرغړونه وکړي، جریمه کېږي.</p>
<p style="text-align: justify;">د کرکټ نړۍوالې شورا زیاته کړې، د لوبې نړۍوال څارونکي ګرایم لبروای متحده عرب اماراتو لوبډلې ته یاده سزا ورکړې ده.</p>
<p style="text-align: justify;">سرچینې ویلي، د اماراتو کپټان رضوان خپله سزا او جریمه منلې ده؛ سزا یې دا ده چې د دې لوبې ۲۰ فیصده فیس به ترې ګرځول کېږي.</p>
<p style="text-align: justify;">په خبرپاڼه کې دغه راز راغلي، د اماراتو لوبغاړی زیور فرید د افغان لوبغاړي ګلبدین نایب پر وړاندې د ناسم چلند له امله د نړۍوالې شورا د لوبغاړو د ورزشي اصولو یوه ماده ماته کړې او جریمه شوی دی.</p>
<p style="text-align: justify;">دغه لوبغاړي په لوبه کې د افغان لوبغاړي ګلبدین نایب له سوځولو وروسته قصداً د هغه مخې ته ودرېد او هماغه کار یې وکړ چې ګلبدین نایب معمولاً د مخالفو لوبغاړو له سوځولو وروسته کوي. ګلبدین نایب د لوبغاړو سوځولو په خوشحالۍ کې خپلې مټې ښيي او دا یې ځانګړی سټایل دی.</p>
<p style="text-align: justify;">ګلبدین نایب په میدان د دغه لوبغاړي د دغه کار په اړه هیڅ عکسالعمل ونه ښود.</p>
<p style="text-align: justify;">د کرکټ نړۍواله شورا وايي، د فرید زیور دغه کړنه د اصولو خلاف ده او د ورزشي اخلاقو نومرې یې کمې کړې دي. په دې حساب، که زیور فرید دا ډول کارونه تکرار کړي، ممکن د ځینو لوبو له بندیز سره هم مخ شي.</p>
[/restrict]
