<p style="text-align: justify;">غزني (پژواک، ۱۱ کب ۱۴۰۱): چارواکي وايي، د وزیرانو شورا د پرېکړې له مخې، په غزني کې د اسلامي ثقافت مرکز د څارنې او ساتنې چارې د چارو ادارې لوی ریاست ته وسپارل شوې.</p>
<p style="text-align: justify;">د اسلامي ثقافت د مرکز- چې بېلابېلې ودانۍ په کې شاملې دي- له هغه وروسته په غزني کې جوړ شو چې دغه ولایت په ۲۰۰۷ زېږدیز کال کې د اسلامي همکاریو سازمان/ OIC له لوري د ليبیا په پلازمېنه ترابلیس ښار کې د ۲۰۱۳ زېږدیز کال لپاره د اسلامي هېوادونو کلتوري پلازمېنه ونومول شو.</p>
<p style="text-align: justify;">د غزني د والي ویاند حافظ عمر پژواک خبري اژانس ته وویل، له هغه مهاله د دغه ولایت د اطلاعاتو او فرهنګ ریاست، په غزني کې مېشتې محمدي لوا، دولتي تخنیکي پوهنتون، ښاروالۍ، د کرنې ریاست او ځینو نورو ادارو د یاد مرکز د ملکیت دعوه لرله.</p>
<p style="text-align: justify;">هغه زیاته کړه، بالاخره دا موضوع په مرکز کابل کې د وزیرانو شورا ته وړاندې شوه او دې شورا پرېکړه وکړه چې د اسلامي ثقافت مرکز د څارنې او ساتنې چارې به له دې وروسته د چارو ادارې لوی ریاست پر غاړه وي.</p>
<p style="text-align: justify;">دی وايي، پر همدغه بنسټ د چارو ادارې لوی ریاست د اداري او مالي مرستیال مولوي عبدالسلام حقاني په مشرۍ یو پلاوی غزني ته<img class="alignleft wp-image-521234 " src="https://pajhwok.com/wp-content/uploads/2023/03/غزني-اسلامي-ثقافت-مرکز-2-1024x683.jpg" alt="" width="435" height="290" /> راغلی څو د دغه مرکز چارې ور وسپارل شي.</p>
<p style="text-align: justify;">د ده په خبره، یاد پلاوي ته د اسلامي ثقافت د ټولو ودانیو د ورسپارلو چارې پیل شوې چې تر راتلونکو څو ورځو به بشپړې شي.</p>
<p style="text-align: justify;">نوموړي وویل، تر اوسه روښانه نه ده چې د چارو اداره به د دغه مرکز ودانۍ د کومو موخو لپاره وکاروي خو له دې مخکې یې یو شمېر ودانۍ او بلاکونه ځینو بنسټونو ته په کرایه ورکړل شوې وې.</p>
<p style="text-align: justify;">د دغه ولایت د اطلاعاتو او فرهنګ رییس ملا حمیدالله نثار وايي، د وزیرانو شورا دا پرېکړه چې د اسلامي ثقافت مرکز د ودانیو څارنه او ساتنه د چارو ادارې لوی ریاست ته سپاري، پر ځای ګام دی.</p>
<p style="text-align: justify;">نوموړی زیاتوي، په دغه لړ کې یې د چارو ادارې لوی ریاست ته ځیني وړاندیزونه هم کړي او غوښتي یې دي چې د دې ادارې اړوند د ۵۶ ټولګټو پروژو او جوماتونو نیمګړې چارې دې بشپړې کړي.</p>
<p style="text-align: justify;">هغه زیاته کړه، اسلامي امارت هڅه کوي غزني ته د اسلامي نړۍ کلتوري پلارمېنې ورکول شوی نوم ژوندی وساتي.</p>
<p style="text-align: justify;">د غزني اوسېدونکي او مدني فعالان هم د حکومت د دغه اقدام ستاینه کوي او وايي، په دې توګه به د اسلامي ثقافت د مرکز ښه ساتنه وشي.</p>
<p style="text-align: justify;">د دغه ولایت یوه مدني فعال منیراحمد فیضي پژواک خبري اژانس ته وویل، د یاد مرکز د غونډو تالار ودانۍ ځینې برخې د تېرو جګړو له امله زیانمنې یا ویجاړې شوې چې باید ورغول شي.</p>
<p style="text-align: justify;">هغه زیاته کړه، غزني ته له ډېرو هڅو وروسته د اسلامي نړۍ د کلتوري پلازمېنې نوم ورکړل شوی، په کار ده دا نوم ژوندی وساتل شي او د اسلامي ثقافت اړوند ودانیو- چې د ۴۰ میلیون ډالرو په لګښت جوړې شوې- ښه ساتنه وشي.</p>
<p style="text-align: justify;">غزني په ۲۰۰۷ زېږدیز کال کې د اسلامي همکاریو سازمان/ OIC له لوري د ليبیا په پلازمېنه ترابلیس ښار کې د ۲۰۱۳ زېږدیز کال لپاره د اسلامي هېوادونو کلتوري پلازمېنه ونومول شو چې ورسره سم په دغه ولایت کې پر ۳۰۰ جریب ځمکه د اسلامي ثقافت مرکز جوړ شو.</p>
<p style="text-align: justify;">په دغه مرکز کې د یوه لوی جومات په ګډون د احاطې دېوال، دوه لوی د غونډو او اوسېدو بلاکونه، جمنیازیوم، د اسلامي نړۍ تعلیمي، علمي او کلتوري سازمان/ <strong><a href="https://www.google.com/search?hl=en&sxsrf=AJOqlzX089WWAnk3Nx3OkpVNrTLT_tlq8w:1677751529437&q=ICESCO&stick=H4sIAAAAAAAAAONgVuLVT9c3NEwyS6lMLo5PWcTK5unsGuzsDwCBu4VGGgAAAA&sa=X&ved=2ahUKEwj6ubu__7z9AhUxQ_EDHXoBCr8QmxMoAXoECFEQAw">ICESCO</a> </strong>د ۵۲ غړو لپاره- هر یوه ته یو- یو دوه پوړیز بلاکونه چې هر یو یې ۱۶ اتاقونه لري- تاسیس شوي او ترڅنګ یې په لسګونو نور لوی او واړه بلاکونه هم لري چې تر دې مهاله د تخنیکي پوهنتون، شپې پوهنتون او نورو پوهنتونونو محصلینو ګټه ترې اخیسته.</p>
