کابل (پژواک، ۱۵ کب ۱۴۰۱): د نجونو له حضور پرته د پوهنتونونو د نوي تحصیلي سمستر له پیلېدو سره هممهاله ځيني ښځینه او نارینه محصلین له اسلامي امارته غواړي چې د پوهنتونونو دروازې دې د نجونو پر مخ هم پرانیزي.
په افغانستان کې د اسلامي امارت په بیا واکمنېدو د هلکانو او نجونو ټولګیو په جلاوالي سره نجونو ته پوهنتون ته د تلو اجازه ورکړل شوه؛ خو د روان کال د لېندۍ میاشتې په وروستیو کې دولتي او خصوصي پوهنتونونو ته امر وشو چې نجونو ته تر «دویم امر» پورې د تحصیل اجازه ور نکړل شي.
نن د کب ۱۵مه، په افغانستان کې د نوو تحصیلي سمسترونو د پیل ورځ ده، خو په دې توپیر چې یوازې هلکان پوهنتون ته د تللو اجازه لري.
د کابل پوهنتون د ارواهپوهنې پوهنځي د دویم کال محصل ظریف چې نن پوهنتون ته راغلی، د خپلو درسونو پر پیلېدو خوښ دی خو وایي، له بدهمرغه چې نجونو ته پوهنتون ته د تلو او د تحصیل د دوام اجازه نه ده ورکړل شوې.
د هغه په خبره، ښځې او نجونې د کورنیو په باسواده کېدو کې اساسي رول لري او د یوه هېواد د پرمختګ لپاره اړینه ده چې هغوی تحصیل وکړي.
په ورته وخت کې، د کابل پوهنتون د انجنیرۍ پوهنځي محصل احمد منصور یوسفي د خپلو درسونو پیلېدو ته خوښ دی، خو له سرپرست حکومته یې وغوښتل چې د اسلامي احکامو مراعتولو په شرط دې د نجونو پر مخ د پوهنتونونو دروازې پرانیزي او هغوی ته د تحصیل اجازه ورکړي.
په همدې حال کې د کابل پوهنتون یوه محصله هاجره صافۍ وایي، هیلهمنده وه چې د دغه سمستر په پیلېدو سره به نجونو ته هم په پوهنتونونو کې د تحصیل اجازه ورکړل شي، خو دا کار و نه شو چې دا د افغان نجونو په حق کې یوه لویه جفا ده.
د هغې په خبره، د اسلامي امارت په لومړیو کې د نجونو او هلکانو ټولګي سره جلا وو او هغوی حجاب هم مراعتوه، خو له دې سره سره څه موده وروسته پوهنتونونو ته د تلو اجازه ور نکړل شوه.
نوموړې زیاته کړه، اسلامي امارت هر ځل ویلي چې د نجونو د تحصیل پر طرحې کار کوي، خو د ۱۸ میاشتو په تېرېدو سره بیا هم دغه طرحه تر اوسه نه ده بشپړې شوې.
د کابل پوهنتون یوه بله محصله مریم بصیري وایي، نجونو هم د هلکانو په څېر پوهنتون ته د لارموندنې په موخه زحمت اېستلی او هغوی هم لکه د هلکانو په څېر د تحصیل حق لري.
د کابل پوهنتون یوې بلې محصلې فرخندې لنګري نجونو ته پوهنتونونو ته د تګ اجازې پر نه ورکړې خواشیني وښوده او له حکومته یې غوښتنه وکړه چې نجونو ته هم د تحصیل اجازه ورکړي څو د تېر په څېر خپل تحصیل ته دوام ورکړي.
په همدې حال کې، د کابل پوهنتون استاد پوهاند میر عزیزاحمد فانوس وایي، له شک پرته چې پوهنتون د هر هېواد پرمختګ لپاره یوه دروازه ده.
فانوس دې ته په اشارې چې په وروستیو کلونو کې نجونې پخپلو درسونو کې ډېرې فعالې وې زیاته کړه، هیله لري چې د نجونو پر مخ د پوهنتون دروازې پرانیستل شي څو افغانستان وکولای شي چې یوه واقعي پر مختګ ته ورسېږي.
دا په داسې حال کې ده چې د نړۍ هېوادونو په ځلونو له اسلامي امارته غوښتي څو ښځو ته د کار او زدهکړو اجازه ورکړي.
ومو غوښتل چې د دغو محصلینو د غوښتنو په اړه د لوړو زدهکړو وزارت نظر هم له واخلو؛ خو سره له ډېرو اړیکو نیولو و نه توانېدو.
د اسلامي امارت چارواکو په ځلونو ټينګار کړی چې پر یوې طرحې کار روان دی او په نهایي کېدو سره به یې نجونو ته د اسلامي شریعت په چوکاټ کې د تحصیل اجازه ورکړل شي.
GET IN TOUCH
NEWSLETTER
SUGGEST A STORY
PAJHWOK MOBILE APP