فېروزکوه (پژواک، ۲۰ کب ۱۴۰۱): د غور سیمهییز مسوولین د غور – هرات د ۲۰ کیلومتره سړک پخولو تړون او د دغه ولایت په تیورې ولسوالۍ کې د ۱۵ کیلومتره سړک جوړېدو خبر ورکوي او وایي، ډېر ژر به د غور– هرات سړک قیرکولو عملي چارې پیل شي.
د غور د والي ویاند عبدالواحد حماس پژواک اژانس ته وویل، د کابل – غور لویېلارې قیرکولو قرارداد په دې وروستیو کې په کابل کې د غور والي له خوا د «بنیاد تابش» له مسوول سره لاسلیک شو.
هغه زیاته کړه، د یاد سړک د یو کیلومتر پر پخولو ۱۵ میلیون افغانۍ لګښت راځي.
نوموړی وایي، د یاد ولایت په تېورې ولسوالۍ کې د ۱۵ کیلومتره سړک د جوړېدو چارې د خوړو نړۍوال سازمان په مالي ملاتړ پیل شوې دي.
د غور د کلیو او پراختیا ریاست مطبوعاتي مسوول ذبیحالله غوثيزاده پژواک ته وویل، دغه سړک د تېورې ولسوالۍ پشورې او نیلي کلي نښلوي چې د دې پروژې په بشپړېدو سره به ۵۰۰ کورنۍ مستفیدې شي.
د نوموړي په خبره، په دې پروژه کې له سلو ډېرو کسانو ته د کار زمینه برابره شوې ده.
په ورته وخت کې، د غور اوسېدونکي د دغه ولایت د پراختیایي پروژو د تطبیقولو په موخه د سیمهییزو مسوولینو له هڅو خوښ دي او له دولته د غور – هرات لویېلارې د رغولو غوښتنه کوي.
د غور یو اوسېدونکی حفیظالله وایي، د مرکزي لویېلارې جوړېدل چې د هېواد ختیځ له لویدیځ سره نښلوي، له اقتصادي پلوه ځانګړي ارزښت لري او دولت باید د دې لارې جوړولو ته جدي پاملرنه وکړي.
هغه زیاته کړه: «لومړی د دولت له هڅو مننه کوو او هیلهمند یو چې په نږدې راتلونکي کې مرکزي لویهلاره قیر شي، د دې لارې پخول زموږ خلکو ته له اقتصادي اړخه ډېر اهمیت لري؛ ځکه چې د غور د ټولو خلکو لومړني توکي له هرات ولایت څخه واردېږي او اړتیا ده چې دا لاره جوړه شي.»
د غور یو بل اوسېدونکی محمدانور هم وایي چې مرکزي لویهلاره تر ټولو لنډه لار ده چې کولای شي د هېواد مرکز له لویدیځو ولایتونو سره ونښلوي، دولت باید د دې لارې جوړولو ته جدي پاملرنه وکړي.
Visits: 27
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن