<p style="text-align: justify;">کابل (پژواک، ۲۱ کب ۱۴۰۱): د صنعت او سوداګرۍ وزارت وايي، په افغانستان کې د کاغذي دستمالونو د تولید ۲۲ فابریکې فعالیت لري چې په دې برخه کې یې هېواد پر ځانبسیاینې ته رسولی دی.</p>
<p style="text-align: justify;">یاد وزارت نن (د کب ۲۱مه) په یوه ټویټ کې ویلي، افغانستان د ۵۰ قلمه کورنیو تولیداتو په ځانګړې توګه د کاغذي دستمالونو په تولیداتي برخه کې پر ځان بسیاینې ته رسېدلی دی.</p>
<p style="text-align: justify;">د صنعت او سوداګرۍ وزارت د کاغذي دستمال د تولیداتو په برخه کې پر ځان بسیاینه د افغانستان لپاره لویه لاسته راوړنه بللې او ویلي یې دي، پر دې سربېره چې د کاغذي دستمالونو په برخه کې یې د خلکو اړتیا پوره کړې، ګڼو کسانو ته د کار زمینه هم برابره شوې ده.</p>
<p style="text-align: justify;">په یاد ټویټ کې راغلي چې په هرات، کندهار او کابل ولایتونو کې د کاغذي دستمال د تولید ۲۲ فابریکې فعالیت کوي.</p>
<p style="text-align: justify;">په ورته مهال، د دغه پوسټ یوه لیدونکي ابومحمد شیراني لیکلي: «په هره برخه کې چې پر ځان بسیا یو، پر هغه توکو ګمرکي تعرفه لوړه کړئ څو افغانستان ته رانه شي او له کورنیو تولیداتو ګټه واخلو.»</p>
<p style="text-align: justify;">دا په داسې حال کې ده چې صنعتګرو تل په هېواد کې د ورته توکو چې په هېواد کې تولیدېږي له واردېدو شکایت کوي او له حکومته غواړي چې د وارداتو مخه یې ونیسي.</p>
<p style="text-align: justify;"></p>
