پلخمري (پژواک، ۸ وری ۱۴۰۲): د بغلان ولایت امنیتي مسوولین وايي، امنیتي ځواکونو د دغه ولایت په دوشي ولسوالۍ کې لسګونه لرې واټن ویشتونکې مرمۍ ترلاسه کړې دي.
د بغلان ولایت سرپرست امنیه قوماندان ملا اخترمحمد بریالي نن (د وري ۸ مه) پژواک اژانس ته وویل، په دغه ولایت کې له ترهګرۍ سره د مبارزې مدیریت ځواکونو له خوا د کشفي عملیاتو په لړ کې -چې د دغه ولایت د دوشي ولسوالۍ په کیان دره کې یې ترسره کړي- د لرې واټن ویشتونکو درنو وسلو لسګونه مرمۍ ترلاسه کړې دي.
هغه وايي، ترلاسه شوي مهمات د چهلیک په نوم ۶۴ مرمۍ دي چې کلونه وړاندې په کورنیو جګړو کې د ښکېلو غاړو له خوا تر خاورو لاندې پټې شوې وې.
د هغه په خبره، دغه مرمۍ وړمه ورځ کشف شوې خو په تړاو یې څوک نیول شوي نه دي.
دغهراز له ترهګرۍ سره د مبارزې مدیر خالداحمد بلال وايي، یاد مهمات د سیمې اوسېدونکو د همکارۍ په پایله کې ترلاسه شوي.
هغه وايي: «په هره سیمه کې ځانګړې منابع لرو، کله چې پر یو ځای شک راشي امنیتي ځواکونه هلته ځانګړي عملیات ترسره کوي چې په نتیجه کې نا قانونه ساتل شوې وسلې او نور مهمات ترلاسه کېږي.»
د نوموړي په خبره، له دې وړاندې په نهرین ولسوالۍ کې هم د کشفي عملیاتو په لړ کې یوه اندازه وسلې او نور مهمات ترلاسه شوي وو.
غړيYou need to subscribe to view the full article. Please login or register a new account.
