راشد خان یو ځل بیا د شل اووریزو لوبو په نړۍواله ډل‌بندۍ کې لومړی مقام خپل کړ

کابل (پژواک، ۹ وری ۱۴۰۲): راشد خان یو ځل بیا د کرکټ نړۍوالې شورا له لوري د شل اووریزو لوبو په نړۍواله ډلبندۍ کې لومړی مقام خپل کړی دی.

د کرکټ نړۍوالې شورا له لوري په تازه اعلان شوې ډل‌بندۍ کې راشد خان د ۷۱۰ امتیازونو په ترلاسه کولو سره د شل اووریزو نړۍوالو سیالیو سوکه توپ‌اچونه کې لومړی مقام ګټلی دی.

ياده درجه‌بندي داسې مهال اعلانېږي چې افغانستان تازه له پاکستانه شل اووریزې لوبلړۍ دوه پر یو وګټله.

د اعلان شوې تازه ډل‌بندۍ پر بنسټ، د افغانستان بل چټک توپ‌اچوونکي فضل‌الحق فاروقي په ۶۹۲ امتیازونو سره درېیم مقام ترلاسه کړی او مجیب‌الرحمن بیا اتم ځای خپل کړی دی.

د نړۍوالې درجه‌بندۍ له مخې، د سریلانکا هسرانګا دویم، د اسټرالیا جوش هازلووډ څلورم او د انګلستان عادل رشید پنځم مقام خپل کړی دی.

دغه راز تر دې مخکې هم څو ځلې راشد خان لومړی، دویم او دریېم مقامونه ترلاسه کړي وو.

د یادونې ده، راشد خان د روان کال د فبرورۍ میاشتې په دویمه نېټه هم د کرکټ نړۍوالې شورا له خوا د شل اووریزو لوبو په نړۍواله ډلبندۍ کې لومړی مقام خپل کړی و.