<p style="text-align: justify;">کابل (پژواک، ۱۵ وری ۱۴۰۲): په پاکستان کې د پاک افغان ژورنالېستانو ټولنې له خوا د ځايي ټولنو په مرسته افغان خبریالانو ته د کارتونو ورکولو بهیر پیل شو؛ مسوولین وايي، د خبریالانو ځينې ستونزې به ورسره حل شي.</p>
<p style="text-align: justify;">پژواک خبري اژانس شاوخوا یوه اونۍ وړاندې (د وري په شپږمه) <a href="https://bit.ly/42U8RYR"><strong>راپور</strong></a> خپور کړ چې په پاکستان کې مېشت افغان خبریالان د ویزو او پاسپورټونو د وخت له پای ته رسېدو، د پولیسو له خوا له ځورونې، اقتصادي او نورو ستونزو سر ټکوي او له اړوندو سرچینو یې د حل غوښتنه کوي.</p>
<p style="text-align: justify;">په راپور کې د ځینو خبریالانو له قوله راغلي و چې بېبرخلیکه شوي، ځیني یې پر رواني ناروغيو اخته دي او ماشومان يې له زدهکړو پاتې دي.</p>
<p style="text-align: justify;">په پاکستان کې د پاک افغان ژورنالېستانو ټولنې مشر قمر یوسفزي نن (د وري ۱۵مه) پژواک ته وویل چې په دغه هېواد کې د مېشتو افغان خبریالانو ستونزو ته د رسېدنې لپاره یې د کارتونو ورکړې بهیر نن پیل کړ.</p>
<p style="text-align: justify;">هغه وايي، دغه کارتونه د پاکستان د خبریالانو ملي کلب او د پاکستان د خبریالانو فډرال ټولنې په مرسته، د پاک افغان ژورنالېستانو ټولنې له خوا جوړ شوي دي.</p>
<p style="text-align: justify;">نوموړي زیاته کړه، دوی ته تر اوسه د ۱۵۰ افغان خبریالانو غوښتنې رسېدلې چې د ټولنې ټاکل شوې ډلې له خوا تر ارزونې وروسته ۱۲۰ خبریالان د کارتونو مستحق بلل شوي دي.</p>
<p style="text-align: justify;">د یوسفزي په وینا، دغه کارتونه په پاکستان کې له مېشتو افغان خبریالانو سره د اوسېدو، د پاکستان د خبریالانو ملي کلب اړوند دوو روغتونونو کې وړیا درملنې او د پولیسو له خوا له ځورونې د خلاصون په برخو کې مرسته کولی شي.</p>
<p style="text-align: justify;">قمر یوسفزی وايي، یاد کارتونه خبریالانو ته وړیا ورکول کېږی.</p>
<p style="text-align: justify;">هغه زیاتوي: «په کار ده چې پاکستان کې د افغان خبریالانو ستونزو د حلېدو لپاره د خبریالانو نورې نړۍوالې ملاتړې ادارې هم همکاري وکړي.»</p>
<p style="text-align: justify;">د یادې ټولنې یوه بل غړي او په پاکستان کې مېشت افغان خبریال محمدجان تمکین وویل: «تاسو پوهېږئ چې دلته د خبریالانو په نوم ډېرې ناسمې استفادې وشوې او هر څومره وعدې چې شوې تر ډېره عملي شوې نه دي.»</p>
<img class="wp-image-528079 aligncenter" src="https://pajhwok.com/wp-content/uploads/2023/04/b3921033-09e9-4cdb-b34d-c9b5cf97a83b.jpg" alt="" width="568" height="426" />
<p style="text-align: justify;">هغه وايي، له همدې امله ځینو خبریالانو وغوښتل چې دغه «طلسم» مات او عملي کار پیل کړي.</p>
<p style="text-align: justify;">تمکین زیاته کړه، اوس په دې هڅه کې دی چې د خبریالانو یو مشخص نوملړ د ملګرو ملتونو د کډوالو ادارې (یوانایچسيار) ته وسپاري څو د کډوالۍ کارتونو په ورکولو کې لازمه همکاري وکړي.</p>
