خوست ښار (پژواک، ۱۸ وری ۱۴۰۲): په خوست کې د ډيوه ګروپ لس اوريز کرکټ رمضان ليګ دويم پړاو پيل شو چې شل ورځې به دوام وکړي.
دغه ليګ چې تېره ورځ مازديګر پيل شو، ۱۶ لوبډلو په کې برخه اخيستې چې د کرکټ ملي لوبډلې، ۱۹ کلنو، ايمرجن او الف لوبډلو يو شمېر لوبغاړي هم په کې ګډون لري.
د ډيوه ګروپ رمضان لس اوريز کرکټ ليګ مسوول جهاد سنګين پژواک اژانس ته وويل چې د کرکټ د ودې او پراختيا ترڅنګ د غوره استعدادونو پېژندنه يې د دغه ليګ موخه ده.
هغه وايي: «دغه رمضان ليګ چې خوست کې پيل شوی، ۱۶ ټيمونه په کې دي، په دې کې مو څلور ګروپونه جوړ کړي، هره لوبډله به په خپل ګروپ کې درې لوبې ترسره کوي او وروسته به بيا دوه ټاپ ټاپ ټيمونه کواټرفاينل ته ځي او هلته به سيمې فاينل لوبې کوي او بيا به فاينل وي.»
ورته مهال د کرکټ په دې سياليو کې لوبېدونکي ځوان لوبغاړي وايي، د دوی لپاره دا ښه چانس دی چې له سېنير او باتجربه لرونکو لوبغاړو څخه ډېر څه زده کړي.
دوو لوبغاړو اصغر اتل او حسيب الله لکڼوال پژواک ته وويل: «دا د جېنير لوبغاړو لپاره ښه فرصت دی چې د نېشنل پلېيرانو سره لوبېږي، لکه احسان جنت دی چې زموږ لوبډله کې نورعلي ځدراڼ دی، په هره لوبډله کې داسې لوبغاړي شته چې هغې نېشنل لوبې کړې دي، فارسټ کلاس يې کړې دي، لېست اې يې کړي دي، شپږيزه يې کړې ده. نوي لوبغاړو ته ډېر زرين چانس دی چې د هغې څخه ډېر څه زده کړي.»
د کرکټ د ملي لوبډلې لوبغاړي احسان جنت چې په دې ليګ کې لوبېږي، هم پژواک اژانس ته وويل چې د ځوانو لوبغاړو د روزنې او د نويو تکړه لوبغاړو د پېژندنې په برخه کې دا سيالۍ ډېرې مهمې دي.
دی وايي: «که هر څه رقم لوبې وي، د لوبغاړي لپاره ډېرې مهمې وي او ډېرې ګټورې وي. دا لوبې چې دي کرکټ بورډ سره ثبت دي، نو نوي نوي لوبغاړي په کې راوځي. کرکټ بورډ دې نه ډېر نوي لوبغاړي پيدا کولی شي.»
د ياد ليګ مسوولينو په وينا، د کرکټ يادې سيالۍ به تر شلو ورځو پورې دوام وکړي.
غړيYou need to subscribe to view the full article. Please login or register a new account.
