ملګري ملتونه د افغانستان سرپرست حکومت د پر رسمیت پېژندنې په اړه نړۍوال کنفرانس جوړوي

[restrict paid=”true”]

اټلانټا (پژواک، ۳۰ وری ۱۴۰۲): ملګري ملتونه وایي، راتلونکې میاشت په قطر کې د افغانستان په تړاو نړۍواله ناسته جوړیږي چې په کې د دغه هېواد لپاره د ټولو هېوادونو ځانګړي استازي ګډون کوي.

د امریکا غږ د خبر له مخې، د ملګرو ملتونو د سرمنشي مرستیالې امنې محمد د وري په ۲۹مه د نړۍوالو اړیکو یوه پوهنتون کې د وینا پر مهال ویلي چې دغه کنفرانس په راتلونکو دوو اونیو کې په سیمه کې جوړیږي.

خو هغې د دې ناستې کره نېټه او هېواد نه دی په ډاګه کړی.

بلخوا، د افغانستان لپاره د امریکا پخواني ځانګړي استازي زلمي خلیلزاد په یوه ټویټ کې لیکلي چې یاد کنفرانس د راتلونکې مې میاشتې په لومړۍ نېټه په قطر کې جوړیږي.

د ملګرو ملتونو د سرمنشي مرستیالې ویلي، له کنفرانس څخه یې موخه د افغانستان د سرپرست حکومت د پر رسمیت پېژندلو په اړه سلا مشورې کول دي.

هغې زیاته کړې چې په دغه کنفرانس به د نورو ترڅنګ د افغانستان لپاره د ټولو هېوادونو ځانګړي استازي ګډون کوي.

آمنه محمد وایي: «په دغه کنفرانس کې به د ملګرو ملتونو سرمنشي انتوني ګوټریش، د سیمې او نړۍوالې ټولنې ټول ځانګړي استازي په یوه مېز سره کښېني.»

دې ویلي، د افغانستان سرپرست حکومت پر رسمیت پېژندل غواړي او په دغه کنفرانس کې به پر دې غور او بحث کېږي.

د ملګرو ملتونو دغه لوړپوړې چارواکي په تېرې جنورۍ میاشت کې افغانستان ته د سفر پر مهال د سرپرست حکومت له بېلابېلو چارواکو سره لیدلي وو.

امنه محمدي دا څرګندونې په داسې حال کې کړې چې د افغانستان سرپرست حکومت د نجونو پر زده‌کړو او د ښځو پر کار بندیز لګولی او د ملګرو ملتونو پرمختیایي ادارې نن ګواښ وکړ چې که د دوی په ادارو کې ښځو ته د کار اجازه ورنه کړل شوه، نو دوی به راتلونکې میاشت کې له افغانستانه ووځي.

بلخوا د امریکا پخواني ځانګړي استازي په یوه ټویټ کې د دغه کنفرانس په اړه ځینې وړاندیزونه کړي دي.

هغه د دوحې تړون پر بشپړ عملي کېدا ټینګار کړی او ویلی یې دي چې دا باید د دغه کنفرانس مهم هدف وي. دغه راز د طالبانو د مشرانو ترمنځ هم د دغه تړون پر عملي کولو یووالی رامنځته شوی او د امنیت شورا هم په یوه مصوبه کې دا تړون مهم بللی دی.

د هغه په وینا، دغه راز د پخواني افغان جمهوري دولت یو شمېر مشران او چارواکي هم دا تړون د افغانستان د ننګونو هواري لپاره مهم چوکاټ ګڼلی دی.

د خلیلزاد په وینا، دا تړون تر اوسه سم عملي نه دی شوی او نه هم بل بدیل شته.

د هغه په وینا، د دې لپاره چې یاد تړون څه ډول عملي شي او د راتلونکي لپاره یوه د لار نقشه جوړه شي، د ملګرو ملتونو سرمنشي باید له اسلامي امارت سره یوه ځانګړې ناسته هم ولري.

زلمي خلیلزاد ویلي، په دې ناسته کې باید له طالبانو سره خبره وشي چې د دوحې تړون عملي کول غواړي که نه او دغه راز د راتلونکې لار نقشه کې باید د ښځو پر زده‌کړو او کار هم ډېر تمرکز وشي.

هغه وایي، د قطر د دغه کنفرانس د پرېکړو د تعقیب لپاره د ملګرو ملتونو سرمنشي باید یو ځانګړی استازی وټاکي.

[/restrict]