<p style="text-align: justify;">سرپل، قلعهنو (پژواک، ۲۰ غویی ۱۴۰۲): سیمهییزې سرچینې په بادغیس ولایت کې د یوې ځوانې نجلۍ او په مزارشریف کې د یوه سړي له خوا د خپلې ښځې د وژل کېدو خبر ورکوي.</p>
<p style="text-align: justify;">د باغیس د امنیې قوماندانۍ مطبوعاتي دفتر د یوې اعلامیې په خپرولو سره ویلي، تېره شپه د دغه ولایت د بالامرغاب ولسوالۍ په اکازیو کلي کې یوه ښځه د نامعلو وسلهوالو له خوا په ډزو وژل شوې ده.</p>
<p style="text-align: justify;">په اعلامیه کې راغلي چې د یادې ولسوالۍ امنیتي ځواکونو د پېښې څرنګوالي معلومولو او د مجرم پېژندلو په موخه څېړنې پیل کړې دي.</p>
<p style="text-align: justify;">په ورته وخت کې، د بادغیس د بالامرغاب ولسوالۍ یوه قومي مشر چې نه یې غوښتل نوم یې واخیستل شي، پژواک ته وویل چې دغه پېښه تېره شپه شاوخوا ۱۰ بجې د دغه ولایت د بالامرغاب ولسوالۍ په اکازیو کلي کې شوې ده.</p>
<p style="text-align: justify;">هغه زیاته کړه: «مقتوله عالیه نومېده او تېره شپه په داسې حال چې ویده وه، وسلهوال کس یې کور ته ورغلی او پرې ډزې کړې او وروسته له سیمې تښتېدلی دی.»</p>
<p style="text-align: justify;">د هغه په خبره، وژل شوې نجلۍ ۱۶ کلنه او کوژدن شوې وه.</p>
<p style="text-align: justify;">د یوه بل خبر له مخې، د بلخ په مرکز مزارشریف ښار کې یوه کس خپله ښځه وژلې ده.</p>
<p style="text-align: justify;">د یادې پېښې په تړاو د سرپل ولایت د امنیې قوماندانۍ ویاند دینمحمد نظري وایي، تېره ورځ د سرپل د مرکز اړوند لغمان کلي اوسېدونکي ۳۵ کلن عبدالرازق -چې له ایرانه راستون شوی و- خپله مېرمن چې ۱۷ کلنه وه، د مزارشریف ښار د قلعهزینې لاره کې د چاړه په وسیله وژلې ده.</p>
<p style="text-align: justify;">نوموړي زیاته کړه چې دغه کس د پېښې له ځایه تېښتېدلی، خو د نیولو لپاره یې هڅې روانې دي.</p>
<p style="text-align: justify;">هغه وویل چې دغه کس له خپلې ښځې سره شاوخوا پنځه کاله په ایران کې کډوال و.</p>
<p style="text-align: justify;">هغه د تورن کس د کورنۍ له قوله ویلي چې دا پېښه د کورني تاوتریخوالي په پایله کې شوې ده.</p>
