<p style="text-align: justify;">مزارشریف (پژواک، ۳ غبرګولی ۱۴۰۲): د بلخ ولایت په بلخ ولسوالۍ کې د یونسیف ادارې په مالي ملاتړ د نجونو په ګډون ۵۰۰ بېوزله ماشومانو ته د زدهکړو زمينه برابره شوه.</p>
<p style="text-align: justify;">په بلخ ولسوالۍ کې د دغه ښوونیز مرکز مدیره ښایسته شېرزاد وایي، په دغه مرکز ۵۰۰ هغه ماشومانو ته د معیاري زدهکړو زمینه برابره شوې چې تر دې وړاندې یې د اقتصادي ستونزو له امله د سړکونو له غاړو کباړ او پلاستیکي توکي راټولول.</p>
<p style="text-align: justify;">شېرزاد وایي، دغو ماشومانو ته د زدهکړو زمینه د اکټید موسسې په مرسته او د یونسیف ادارې په مالي ملاتړ برابره شوې چې له دې ډلې ۲۵۰ نجونې او ٢٥٠ يې هلکان دي.</p>
<p style="text-align: justify;">د هغې په وینا، دغو ماشومانو ته په یاد مرکز کې د سهارنۍ، غرمنۍ، او ورزش ترڅنګ د نورو زدهکړو زمينه هم برابره شوې ده.</p>
<p style="text-align: justify;">شېرزاد زیاته کړه، یادو ماشومانو ته به په دغه مرکز کې ۹ میاشتې زدهکړې ورکول کېږي او له فراغت وروسته به د دوی وړتیاوو ته په کتو د نورو زدهکړو په موخه دولتي ښوونځیو ته وروپېژندل شي.</p>
<p style="text-align: justify;">په همدې حال کې، د بلخ ولسوالۍ ځایي مسوولین بیا وایي چې دغه خدمات بايد ډېر شي.</p>
<p style="text-align: justify;">د بلخ ولسوالۍ مالي او اداري مدیر اسدالله برهاني که څه هم د یادې موسسې له فعالیتونو هرکلی کوي، خو وایي چې په دې ولسوالۍ کې د بېوزلۍ کچه ډېره ده او دغه ډول برنامې دوی ته بسنه نه کوي.</p>
<p style="text-align: justify;">برهاني له نورو نړۍوالو مؤسسو څخه غواړي څو په یادې ولسوالۍ کې دغه ډول نور فعالیتونه هم ډېر کړي.</p>
<p style="text-align: justify;">په ورته وخت کې، د یاد مرکز زدهکوونکي دوی ته د دغه ډول فرصت له برابرېدو خوښي څرګندوي.</p>
<p style="text-align: justify;">د یاد مرکز زدهکوونکی منصور د خوښۍ په څرګندولو سره وایي، تر دې وړاندې حلبيسازۍ کې شاګرد و خو اوس په دغه مرکز کې د زدهکړو فرصت ورته برابر شوی دى.</p>
