<p style="text-align: justify;">ترینکوټ (پژواک، ۹ غبرګولی ۱۴۰۲): د اروزګان په مرکز ترینکوټ کې نن د دغه ولایت د اطلاعاتو او فرهنګ ریاست له خوا د کتاب اوونۍ نمانځنې په موخه د کتاب نندارتون پرانیستل شو.</p>
<p style="text-align: justify;">د یاد ولایت د اطلاعاتو او فرهنګ رییس قاري اغاولي قریشي د نندارتون د پرانیستې پر مهال وویل: «موږ هڅه کوو چې د دغه ډول نندارتونونو په جوړولو سره د ځوانانو پام کتاب او مطالعې ته واړوو.»</p>
<p style="text-align: justify;">هغه زیاته کړه، د کتاب له مطالعې سره د خلکو په ځانګړې توګه ځوانانو لېوالتیا کمه شوې او دوی هڅه کوي چې د مطالعې فرهنګ ته وده ورکړي.</p>
<p style="text-align: justify;">قریشي وايي، په یاد نندارتون کې کلتوري، ديني، ټولنيز، ادبي، سياسي او تاريخي کتابونه نندارې ته وړاندې شوي دي.</p>
<p style="text-align: justify;">د یاد ریاست د فرهنګ او ګرځندوی برخې مسوول مولوي شرافالدین ساجد له خلکو او په ځانګړې توګه له ځوانانو وغوښتل چې وخت پر وخت د هغوی ادارې کې له شته کتابتون څخه ګټه واخلي او خپله مطالعه ډېره کړي.</p>
<p style="text-align: justify;">ساجد زیاته کړه، کتاب د عامه اذهانو او فکري رغونې سمبول دی، هیله ده چې هر انسان د امکان تر بریده مطالعه وکړي.</p>
<p style="text-align: justify;">یاد نندارتون ته ورغلي ځوانان او د کتاب لوستونکي خوشحاله دي چې په لومړي ځل دغه ډول نندارتون پرانیستل کېږي.</p>
<p style="text-align: justify;">د ترینکوټ ښار اوسېدونکی او د سېدال خان لېسې د یوولسم ټولګي زدهکوونکی عصمتالله قلمیار چې یاد نندارتون ته ورغلی وایي، دلته یې ډېر شمېر کتابونه ولیدل چې مطالعه یې د هغه لپاره خورا مهمه ده.</p>
<p style="text-align: justify;">دیني عالم او د مرکز ترینکوټ اوسېدونکي مولوي عتیقالله پژواک اژانس ته وویل، دغه ډول نندارتونونه په خلکو کې د مطالعې مینه زیاتولی شي.</p>
<p style="text-align: justify;">هغه زیاته کړه، په ننني نندارتون کې د دیني او عصري علومو ګڼ کتابونه نندارې ته اېښودل شوي دي.</p>
<p style="text-align: justify;">د یادونې ده، اروزګان په تېره شل کلنه جګړه کې ناامنه ولایت و چې له امله يې د نورو برخو ترڅنګ د پوهنې برخه هم زیانمنه شوې ده.</p>
