<p style="text-align: justify;">کابل (پژواک، ۲٥ غبرګولي ۱۴۰۲): په کابل ښار کې د ۵۳۰ میلیونه افغانیو په لګښت د یوه سړک جوړولو چارې پیل شوې او دغه راز یو بل سړک بیا د ۵۶ میلیون افغانیو په لګښت جوړ او ګټې اخیستنی ته وسپارل شو.</p>
<p style="text-align: justify;">د کابل ښاروالۍ ساختماني او ترانسپورټي مرستیال عمار یاسر د یادې پروژې د پيل پر مهال وویل، دغه سړک چې ٥٣٠ ميليون افغانۍ لګښت لري، د کابل شمال له لوېدیځ سره او همدارنګه د کابل ښار ۱۷مه، ۱۵مه او ۱۳مه ناحیې له یو بل سره نښلوي.</p>
<p style="text-align: justify;">هغه وایي، دغه سړک ۷،۵ کیلومتره اوږدوالی او ۳۰ متره سور لري چې مالي لګښت يې د ښاروالۍ له بودجې ورکول کېږي.</p>
<p style="text-align: justify;">یاسر زياتوي، د دغه سړک جوړولو چارې به د ۱۸ میاشتو په موده کې بشپړې شي او ورسره به تر ډېره د سيمې ترافيکي ګڼهګوڼه کمه او ترانزیټي موټرو لپاره به هم اسانتیاوې رامنځته شي.</p>
<p style="text-align: justify;">دغه راز په دې نیول شوو مراسمو کې د رییسالوزرا اقتصادي مرستیال ملا برادر اخند د کابل ښاروالۍ د کارونو ستاینه وکړه، ویې ویل چې کابل ښار ورځ تر بلې ښکلى کېږي.</p>
<p style="text-align: justify;">هغه زیاته کړه: «په نړۍ کې چې کوم هېواد پرمختګ کوي، اول د هغه هېواد د پرمختګ لپاره یوازېنی شرط امنیت دی؛ موږ چې د کابل ښار مخکنی حالت ګورو نو اوس ورځ تر بلې د ښهوالي خوا ته روان دى.»</p>
<p style="text-align: justify;">هغه وایي، نن په کابل ښار کې د دغه سړک تر څنګ د څلورو نورو پروژو پرانیسته هم ده.</p>
<p style="text-align: justify;">برادر وايي، که د چا کور د سړک په اوږدو کې راشي او تخريبيږي، خواشينى کېږي دې ن؛ ځکه په دې کې ملت ته خير رسېږي.</p>
<p style="text-align: justify;">بلخوا، نن یو سړک د کابل ښار پنځمې ناحیې اړوند د قمبر څلورلارې سیمه کې د کابل ښاروالۍ له لوري ګټې اخیستنې ته وسپارل شو.</p>
<p style="text-align: justify;">د دغه سړک په اړه د کابل ښاروالۍ د ښاري خدمتونو مرستیال مولوي خالد سجستاني وویل: «د دغه سړک چارې بشپړې شوې چې د شېرولي وردګ واټ له قلعهوزیر سره نښلوي او ۱۰۵۰ متره اوږدوالی او ۳۰ متره پلنوالی لري.»</p>
<p style="text-align: justify;">نوموړی وایي، پر یاد سړک شاوخوا ۵۶ میلیون افغانۍ لګښت راغلی چې د کابل ښاروالۍ له خوا ورکئل شوی دی.</p>
<p style="text-align: justify;">دغه راز د پنځمې ناحیې د قمبر څلورلارې یوه اوسېدونکي احمد فواد پژواک ته وویل چې د یاد سړک په جوړېدو سره به تر ډېره د دې سيمې ترافيکي ګڼهګوڼه کمه شي.</p>
<p style="text-align: justify;">هغه وویل: «ډېر ښه کار وشو، مخکې پر دغه سړک د موټرو ډېر رش و، هر وخت به لار بنده وه، نو د دغه سړک په جوړېدو سره دغه ستونزه حل شوه او خلک به په اسانۍ سره له یو ځای څخه بل ځای تګ راتګ وکړي.»</p>
<p style="text-align: justify;">د یادونې ده، د روان کال وري میاشتې په ۲۴مه په کابل ښار کې د خیرخانې کوتل سړک د دویمې برخې جوړولو چارې هم د ښاروالۍ له لوري پیل شوې.</p>
