کابل (پژواک، ۱۵ چنګاښ ۱۴۰۲): د افغانستان د کډوالو او بېرته راستنېدونکو چارو وزارت وایي، ۳۳ افغانان چې د قانوني اسنادو نه لرلو له امله پاکستان کې نیول شوي وو، ازاد او هېواد ته راستانه شول.
یاد وزارت نن په خپله ټویټرپاڼه کې لیکلي، یاد کسان – چې له یوې میاشتې تر یو کال موده یې د پاکستان په بېلابېلو زندانونو کې تېره کړې وه - تېره ورځ هېواد ته راستانه شول.
سرچینې زیاته کړې، یاد افغانان پاکستان کې د افغانستان سفارت او په هغه هېواد کې د کډوالو چارو اتشې د هڅو په پایله کې خوشي شوي دي.
د سرچینې د معلوماتو له مخې، یاد کسان د ننګرهار د کډوالو چارو امریت کې له ثبت وروسته د مرستې ترلاسه کولو په موخه د کډوالۍ نړۍوال سازمان (ایاواېم) ته ورپېژندل شوي دي.
دا په داسې حال کې ده چې پاکستان کې د افغانستان سفارت د تېرې غبرګولې میاشتې په ۳۰ مه ویلي وو چې تر اوسه شاوخوا ۴۰۰۰ افغان کډوال د پاکستان له زندانونو ازاد او هېواد ته استول شوي دي.
دغه سفارت نه وو ویلي چې دغه څلور زره کسان له څه وخت راهیسې خوشي شوي دي.
