نیلي (پژواک، ۱۷ چنګاښ ۱۴۰۲): د دایکنډي د کرنې ریاست مسوولین وايي، د لومړي ځل لپاره یې د دغه ولایت په مرکز نیلي کې کروندګرو ته د نباتي افتونو او ناروغیو د کنټرول په برخه کې د مسلکي مشورو او لارښوونو په موخه ګرځنده نباتي کلینیک جوړ کړی دی.
هغوی وايي، له دې لارې کروندګرو ته د نباتي ناروغیو او افتونو د له منځهوړو برخه کې مسلکي مشورې ورکول کېږي او ورته سپارښتنې کېږي.
د دایکنډي د کرنې ریاست د نباتاتو ساتنې عمومي مدیر خیرمحمد فرهنګ پژواک خبري اژانس ته وویل، دوی د فصلونو او بوټو د ناروغیو او افتونو ډېرېدو له امله دغه اقدام کړی دی.
هغه زیاته کړه، دغه کلینک هره ورځ کرونګرو ته د کرنې د ودې لپاره په وړیا ډول مسلکي مشورې ورکوي.
نوموړي د یاد کلینیک جوړېدو موخه د نباتي ناروغیو او افتونو مخنیوی، د بېکیفیته، تقلبي او تاریختېر درملو کارونې مخنیوی او دغه راز د غیر مسلکي کسانو له خوا د کرنیزو درملو پلور ګڼي.
نوموړي په دايکنډي ولايت کې د نباتي ناروغۍ او افتونه جدي ګڼي او وايي، د دغه ولايت د خلکو اقتصاد تر ډېره په کرنې او مالدارۍ پورې تړلى او بايد دې برخې ته جدي پاملرنه وشي.
نوموړي زیاته کړه: «نباتي افتونه د بې کیفیته، تاریخ تېر کیمیاوي او له نسخې پرته د ډېرو درملو کارولو او دغه راز په دې برخه کې د غیر مسلکي کسانو شتون له امله رامنځته کېږي نو ځکه یې ګرځنده کلینیک جوړ کړی دی.»
د دایکنډي د کرنې ریاست د نباتاتو ساتنې عمومي مدیر وویل: «د نباتي ناروغیو د کنټرول په برخه کې هغه څه چې ډېر مهم دي سم تشخیص دی، څو چې سم تشخیص ونه شي، نباتي آفتونه او ناروغۍ نه کنټرولېږي او د تشخیص لپاره یې مسلکي کس ته اړتیا ده.»
فرهنګ وايي، دا چې ګرځنده کلینیک په ګڼو بازارونو او ځایونو کې جوړیږي، نو د هغه په وينا، دغه پروګرام به شل ورځې دوام وکړي.
نوموړي وویل، په تېرو دوو ورځو کې ۴۰ کسانو دغه کلینیک ته مراجعه کړې او د لارښوونې نسخې یې ترلاسه کړې دي.
هغه له بزګرو غواړي چې له غیرمسلکي کسانو درمل ونه پېري او بوټو ته منظم د اوبو او کود ورکولو سیستم جوړ کړي.
دغه راز، په دایکنډي کې کروندګر د یاد ریاست له دغه اقدامه هرکلی کوي او په یاد ولایت کې د کرنې د ودې غوښتنه کوي.
یوه کروندګر سیداحمد پژواک ته وویل، مخکې به يې له خپلو ګاونډيانو سره د نباتاتو د هر ډول ناروغۍ په اړه مشوره کوله چې له امله یې ډېری وخت زیان لید.
نوموړي څرګندوي چې مسلکي او علمي مشورې کولای شي د کرنې د ودې لامل شي.
هغه زیاته کړه، د اوبو کمښت او اقلیمي شرایطو له امله د دوی ځیني فصلونه زیانمن شوي دي.
نوموړي وویل، حکومت باید د کرنې ودې ته - چې د دوی د عوایدو یوازېنۍ سرچینه ده- جدي پاملرنه ولري.
غړي
You need to subscribe to view the full article. Please login or register a new account.
