<p style="text-align: justify;">کابل (پژواک، ۲۱ چنګاښ ۱۴۰۲): د افغانستان د بدن ښکلا ملي لوبډلې لوبغاړي د مالدیف په کوربهتوب د سوېلي اسیا د بدن ښکلا سیالیو کې د څلورم مقام له ګټلو وروسته نن بېرته هېواد ته راستانه شول.</p>
<p style="text-align: justify;">د جنوبي اسیا د بدن ښکلا سیالیو دیارلسم پړاو لوبې د روانې جولای میاشتې په څلورمه پیل شوې او تېره ورځ پای ته ورسېدې.</p>
<p style="text-align: justify;">د دغو ورزشکارانو د راتګ مراسمو کې د بدن ښکلا او فیټنیس فدراسیون رییس باور هوتک وویل، دغه سیالۍ په مالدیف هېواد کې جوړې شوې وې چې د افغانستان په ګډون اوو هېوادونو برخه په کې اخیستې وه.</p>
<p style="text-align: justify;">نوموړی وایي، په دې سیالیو کې هندوستان لومړی، مالدیف دویم، سریلانکا درېيم او افغانستان څلورم مقامونه ګټلي دي.</p>
<p style="text-align: justify;">همدارنګه په دې غونډه کې د بدني روزنې او ورزش ریاست عمومي رییس عبدالودود حقاني وویل چې په دې وروستیو کې افغانستان د ورزش په بېلابېلو برخو کې د پام وړ لاسته راوړنې لري.</p>
<p style="text-align: justify;">نوموړی وایي، همدا ورزشکاران دي چې په نړۍ کې یې د افغانستان هویت ژوندی ساتلی دی.</p>
<p style="text-align: justify;">دغه راز د بدن ښکلا او فټنس د ملي لوبډلې سر روزنکي نورالله داد شیرزاد پژواک ته وویل چې په دې سیالیو کې له افغانستان څخه شپږ ورزشکارانو برخه اخیستې وه.</p>
<p style="text-align: justify;">دی وایي چې افغانستان په دې سیالیو کې درې د نقرې او یو د برنزو مډالونه وګټل او دغه راز دوه ورزشکارانو بیا څلورم مقام ترلاسه کړ.</p>
<p style="text-align: justify;">هغه زیاته کړه چې افغانستان په تېر ۲۰۱۹ کې د یادو سیالیو اتلولي ګټلې وه، ځکه هغه وخت له افغانستان څخه ۲۳ ورزشکارانو په بېلابېلو کټګوریو کې ګډون کړې و خو سږکال د اقتصادي ستونزو له امله کمو لوبغاړو ګډون کړې وو.</p>
<p style="text-align: justify;">هغه له مسوولینو او سوداګرو غوښتنه وکړه چې د بدن ښکلا ورزشکارانو مالي ملاتړ دې وکړي.</p>
<p style="text-align: justify;">د دغو سیالیو ګډونوال ابوبکر برهاني پژواک ته وویل، خوښ دی چې په دې سیالیو کې یې د ۷۵ کیلو ګرام وزن کې د برنزو مډال ګټلى دى.</p>
<p style="text-align: justify;">نوموړی وايي، شاوخوا دوه میاشتې وروسته په نیپال کې د بدن ښکلا اسیایي سیالې ترسره کېږي او له مسوولینو یې غوښتنه وکړه چې ددغې رشتې د ورزشکارانو مالي ملاتړ وکړي ترڅو هلته ښې لاسته راوړنې ولري.</p>
<p style="text-align: justify;">دغه راز د جنوبي اسیا د بدن ښکلا سیالیو دیارلسم پړاو کې علي رضا اساهي په ۹۰ کیلوګرامه وزن کې، وحیدالله نورزاد په ۸۵ کیلوګرامه وزن کې او جواد میرزایي په ۸۰ کیلوګرامه وزن کې د نقرې مډالونه ګټلي دي.</p>
<p style="text-align: justify;">په یادو سیالیو کې ابوبکر برهاني په ۷۵ کیلوګرامه وزن کې بیا د برنزو مډال ترلاسه کړ او دغه راز عبدالصبور سهاک په ۷۵ کیلوګرامه وزن کې او شریفالله شریفي په ۹۰ کیلوګرامه وزن کې په څلورم مقام کې راغلي دي.</p>
<p style="text-align: justify;"></p>
<p style="text-align: justify;"></p>
<p style="text-align: justify;"></p>
