ښرنه (پژواک ۸ زمری ۱۴۰۲): پکتیکا ولایت کې د سرې میاشتې سیمهییز دفتر وایي، د دغه ولایت په ګیان او برمل ولسوالیو کې یې له زلزلهځپلو سره ۱۳،۹ میلیون افغانۍ نغدي مرستې کړې دي.
د سره میاشت سیمهییز دفتر د عامه اړیکو مسوول جاوېد الیاس پژواک خبري اژانس ته وویل، دا مرستې د زلزلهځپلو ۲۰۵ کورنیو سره د هغوی د کورونو د رغولو په پار وشوې.
هغه زياته کړه، د سرې میاشتې له خوا زلزلهځپلو سره ۵۰ میلیون افغانۍ نغدي مرستې کېږي چې تر اوسه یې شاوخوا ۳۰ سلنه وېشل شوې دي.
د هغه په خبره، په ګیان ولسوالۍ کې ۱۹۳ زلزلهځپلو کورنیو ته پرون او برمل کې ۱۲ زلزلهځپلو کورنیو ته نن یادې مرسته ورسېده چې هرې کورنۍ ته ۶۸ زره افغانۍ ورکړل شوې.
نوموړی زیاتوي، پاتې مرستې به په دوو نورو قسطونو کې د کورونو د کار په جریان کې او بیا تر سرته رسېدو وروسته ووېشل شي.
بلخوا د سیمې خلک وایي چې دې مرستو سره به یې د سرپناه ستونزې حل شي.
د ګیان ولسوالۍ د ګلۍ کلي یوه اوسېدونکي ګلالرحمن پژواک اژانس ته وویل: «د تېر کال په زلزله کې زما کور مکمل وران شو چې ځوان زوی مې په کې شهید شو او نور ډېر راته زخمیان شول.»
د هغه په خبره، اوس چې د سرې میاشتې له خوا نغدي مرسته ورسره وشوه خپل کور به پرې ورغوي.
د ګلۍ کلي یو بل اوسېدونکی احمد خان هم وایي، دې مرستې سره به د سرپناه خاوند شي.
هغه زياتوي: «دلته په ګیان کې زلزلې د ډېری خلکو کورونه وران کړي، اوس چې موږ ته دا مرسته ورسېده، موږ یې مننه کوو.»
د هغه په وینا، لا هم ډېری زلزله ځپلې کورنۍ بې سرپناه ژوند کوي او کورونه یې وران دي.
د پکتیکا په برمل، ګیان او زېړوک ولسوالیو کې د تېر کال په زلزله کې ۱۲ زره کورونه وران شول چې شاوخوا ۱۵۰۰ کسانو ته په کې مرګ ژوبله اوښتې وه.
غړيYou need to subscribe to view the full article. Please login or register a new account.
