[restrict paid="true"]
<p style="text-align: justify;">اټلانټا (پژواک، ۹ زمری ۱۴۰۲): د افغانستان بهرنیو چارو وزارت وایي چې په قطر کې له امریکایي پلاوي سره یې دوه ورځې پرلهپسې پر بېلابېلو موضوعاتو خبرې کړې دي.</p>
<p style="text-align: justify;">د بهرنیو چارو وزارت له خوا د زمري په ۱۹مه خپره شوې خبرپاڼه کې راغلي چې د بهرنيو چارو د سرپرست وزير مولوي اميرخان متقي په مشرۍ پلاوي په قطر کې د افغانستان لپاره د امريکا له ځانګړي استازي ټام ويسټ او ورسره پنځلس کسيز لوړرتبه پلاوي سره دوه ورځې پرلهپسې د ګډو او تخنیکي کمېټو په کچه خبرې وکړې.</p>
https://twitter.com/QaharBalkhi/status/1686011687382482944?s=20
<p style="text-align: justify;">له دې مخکې د بهرنیو چارو وزارت دوه ورځې مخکې ویلي وو چې امیرخان متقي په دې خبرو کې د ګډون لپاره قطر ته تللی دی.</p>
<p style="text-align: justify;">په خبرپاڼه کې راغلي، په دې ناستو کې د دواړو لورو ترمنځ د اعتمادجوړونې، په دې لاره کې د عملي ګامونو اخيستلو، تورو لېستونو او بندیزونو لرې کولو، د افغانستان بانک زېرمو ازادولو، د افغانستان اقتصادي ثبات ساتلو، نشهیي توکو خلاف مبارزې او بشري حقونو پر موضوعاتو خبرې وشوې.</p>
<p style="text-align: justify;">سرچینې زیاته کړې، د افغانستان اسلامي امارت يو ځل بيا ټينګار وکړ، د اعتماد جوړونې لپاره مهمه ده چې تور او جايزه لېستونه پورته او بانکي زېرمې خلاصې شي، څو افغانان له بهرنيو مرستو پرته خپل اقتصاد پر پښو ودروي.</p>
<p style="text-align: justify;">د بهرنیو چارو وزارت ویلي، په بشري مرستو، افغانستان ته د ازاد تګ راتګ او افغانانو ته د نړۍ په هره برخه کي د قونسلي خدماتو رسېدل هم مهم موضوعات وو چې بحث ورباندې وشو.</p>
<p style="text-align: justify;">دا چې د افغانستان پر بانکونو زیاتره محدودیتونه لرې شوي او معاملات ورته اسانه شوي یو مثبت پرمختګ وبلل شو.</p>
<p style="text-align: justify;">سرچینې ویلي، همدارنګه دواړو لورو د دې ډول ناستو، تفاهم او تعامل پر دوام ټینګار وکړ.</p>
<p style="text-align: justify;">د امریکا بهرنیو چارو وزارت تر اوسه د دې ناستو په اړه څه نه دي ویلي خو په دې ناستو کې د ګډون په موخه د امریکایي پلاوي له روانېدو وروسته دغه وزارت ویلي وو چې د افغانستان په چارو کې د متحدو ایالتونو ځانګړی استازی ټام ویسټ او په افغانستان کې د بشري حقونو، ښځو او نجونو لپاره د امریکا بهرنیو چارو وزارت ځانګړې استازې رینا امیري به د سرپرست حکومت له پلاوي سره په قطر کې ناستې کوي.</p>
<p style="text-align: justify;">سرچینې زیاته کړې وه، پلاوی به د قطر پلازمېنه دوحه کې د افغانستان سرپرست حکومت له استازو او د "افغانستان د مهمو وزارتونو له مسلکي تکنوکراتانو" سره لیده کاته کوي.</p>
<p style="text-align: justify;">د امریکا بهرنیو چارو وزارت زیاته کړې وه: «په دې ناستو کې به د افغانستان اړوند اساسي مسایلو باندې خبرې کېږي.»</p>
<p style="text-align: justify;">د سرچینې معلوماتو له مخې، د بحث په اصلي موضوعاتو کې به د افغانانو لپاره بشري ملاتړ، اقتصادي ثبات، د ښځو او نجونو په ګډون له ټولو افغانانو سره عادلانه او باعزته چلند، امنیتي مسایل او د نشهيي توکو له تولید او قاچاق سره د مبارزې هڅې شاملې وي.</p>
<p style="text-align: justify;">د قطر له ناستو مخکې امریکایي پلاوي په قزاقستان کې د مرکزي اسیا هېوادونو له استازو سره د افغانستان پر وروستیو حالاتو خبرې کړې وې.</p>
[/restrict]
