کابل (پژواک، ۱۱ زمری ۱۴۰۲): قطر کې د اسلامي امارت د سیاسي دفتر رییس وايي چې د حکومت او نړۍ هېوادونو د پلاوو ترمنځ ناستې اړینې او رغنده دي.
په قطر کې د اسلامي امارت سیاسي دفتر رییس سهیل شاهین نن په یوه ټويټ کې لیکلي، په افغانستان کې واقعیتونه او د بهرنیو رسنیو راپورونه له یو بل سره متضاد دي.
هغه زیاته کړې ده: «د دې په خاطر د اسلامي امارت او د نړۍ هېوادونو ترمنځ ناستې ضروري او رغنده دي.»
دا په داسې حال کې ده چې د بهرنیو چارو وزارت سرپرست مولوي امیرخان متقي او ورسره پلاوي د افغانستان لپاره د امریکا له ځانګړي استازي توماس وېسټ سره د قطر پلازمېنه دوحه کې لیدلي دي.
دې لیدنه کې د دواړو لورو ترمنځ اعتماد جوړونې، په دې برخه کې عملي ګامونو اخیستلو، تور لېست او د تحریمونو لرې کولو، د مرکزي بانک د زیرمو ازادولو، د افغانستان اقتصادي وضعیت او د نشهیي توکو پر وړاندې د مبارزې په اړه خبرې شوې دي.
