اټلانټا (پژواک، ۱۲ زمری ۱۰۴۲): داعش ډلې د خپل پخواني مشر ابو الحسین الحسیني القریشي وژل کېدو خبر ورکړی او د نوي مشر اعلان یې کړی دی.
تر دې مخکې د ترکیې ولسمشر رجب طیب اردوغان د روان کال د اپرېل په ۳۰مه (غوایي ۱۰) ویلي وو چې ترکي ځواکونو په سوریه کې د عملیاتو په ترڅ کې ابوالحسین القریشي وژلی دی.
امریکا غږ د خبر له مخې، د داعش ډلې یوه ویاند په ټیلیګرام کې په یو ثبت شوي پیغام کې تایید کړي چې القریشي په ادلب ښار کې د حیات تحریر الشام له جهادي ډلې سره په نښته کې وژل شوی، خو د هغه د وژل کېدو دقیق وخت یې نه دی په ډاګه کړی.
د داعش دغه ویاند ویلي چې ابو حفص الهاشمي القریشي د یادې ډلې د نوي مشر په توګه ټاکل شوی دی.
ابوالحسین الحسیني القریشي د داعش ډلې څلورم مشر دی چې په ۲۰۱۴ کال کې د دغې ډلې د رامنځته کېدو راهیسې وژل کېږي.
د تېر کال په نومبر میاشت کې داعش د دغې ډلې د پخواني مشر ابو حسن الهاشمي القریشي وژل کېدل تایید کړل او د هغه پر ځای یې د ابو الحسین الحسیني القریشي د ټاکل کېدو خبر ورکړ.
له ابوالحسن القریشي مخکې ابو ابراهیم القریشي د داعش مشر و، چې د تېر کال په فبرورۍ میاشت کې په ادلب کې د امریکايي ځواکونو په عملیاتو کې ووژل شو.
د داعش لومړی مشر ابوبکر البغدادي هم د ۲۰۱۹ کال په اکتوبر میاشت کې د سوریې په ادلب کې د امریکايي ځواکونو په عملیاتو کې وژل شوی و.
د یادونې ده، داعش ډله په ۲۰۱۴ کال کې په عراق او سوریه کې رامنځته شوه.
غړيYou need to subscribe to view the full article. Please login or register a new account.
