<p style="text-align: justify;">پلعلم (پژواک، ۲۹ زمری ۱۴۰۲): د لوګر پوهنې ریاست وایي چې د دغه ولایت په مرکز پلعلم او ولسوالیو کې د پوهنې په چوکاټ کې د نجونو او هلکانو ۶۶ دیني مدرسې پرانیستل شوې.</p>
<p style="text-align: justify;">د لوګر د پوهنې ریاست ویاند شاهپور عرب پژواک خبري اژانس ته وویل، یادې کلیوالي مدرسې د پوهنې ریاست مقام په وړاندیز او د اسلامي زدهکړو امریت په هلو ځلو د پوهنې وزارت د اسلامي زدهکړو معینیت په چوکاټ کې نوې پرانیستل شوې چې ۴۶ د هلکانو او ۲۰ د نجونو دي.</p>
<p style="text-align: justify;">عرب زیاته کړه، د دغو مدرسو په پرانیستل کېدو سره ۵۸۳۳ هلکانو او ۱۵۴۳ نجونو ته په خپلو کلیو کې د دیني زدهکړو زمینه برابره شوه او هم ورته ۱۴۷ نارینه او ۲۰ ښځینه ښوونکي ټاکل شوي دي.</p>
<p style="text-align: justify;">پوهنې ریاست ویاند زیاته کړه: «د لوګر ولایت په یو شمېر نورو ولسوالیو او کلیو کې هم ورته دیني مدرسو ته اړتیا لیدل کېږي او د لوګر پوهنې ریاست رهبري هڅه کوي چې له وزارته د یادو سیمو لپاره هم دیني مدرسې منظورې کړي او د زدهکوونکو پر مخ یې پرانیزي.»</p>
<p style="text-align: justify;">د لوګر اوسېدونکي هم خوښ دي چې د پوهنې وزارت له لوري په کلیوالي سیمو کې د دیني زدهکړو لپاره لسګونه دیني مدرسې پرانیستل شوې دي.</p>
<p style="text-align: justify;">د مرکز پلعلم یوه اوسېدونکي بسمالله پژواک ته وویل، خوښ ده چې پوهنې وزارت لوګر کې لسګونه دیني مدرسې پرانیستې خو ټینګار کوي چې هېواد کې د نجونو پر مخ تړلي ښوونځي هم پرانیستل شي.</p>
<p style="text-align: justify;">د محمداغې ولسوالۍ یوه اوسېدونکي سیدالرحمن پژواک ته وویل، پوهنې وزارت ته په کار ده چې د ديني مدرسو ترڅنګ د ښوونځيو د ودانيو، کتابونو او مسلکي استادانو ستونزې هم هوارې کړي.</p>
<p style="text-align: justify;">دا په داسې حال کې ده چې له دې مخکې هم په لوګر ولايت لسګونه ديني مدرسو په رسمي او غيررسمي ډول فعاليت درلود.</p>
