د کرکټ اسیایي جام سیالۍ؛ د پاکستان او هند لوبه د باران له امله مساوي شوه

[restrict paid="true"]

اټلانټا (پژواک، ۱۰ وږی ۱۴۰۲): د کرکټ اسیایي جام سیالیو په لړ کې د باران له امله د پاکستان او هند مهمه لوبه د باران له امله بې نتیجې پای ته ورسېده او دواړو لوبډلو ته یوه یوه نومره ورکړل شوه.

دغه سیالۍ د پاکستان او سریلانکا په کوربه‌توب روانې دي.

د دې مهمې لوبې پچه هند وګټله او لومړی یې د توپوهنې پرېکړه وکړه. د هند لومړي مهم څلور لوبغاړي د پاکستان د تیز توپ‌اچوونکو له خوا وسوځول شول او لوبډله یې تر سخت فشار لاندې راغله.

خو وروسته پانډیا او کیشن د ۱۵۰ منډو ملګرتیا وکړه او هندوستان وکولی شول په ۵۰ اورونو کې پاکستان ته د ۲۶۱ منډو هدف ورکړي.

د لوبې ترمنځ د وقفې پر مهال باران پیل شو چې بیا د شپې تر ناوخته ونه درېد او دغه راز دا لوبه بې نتیجې مساوي پای ته ورسېده او دواړه ته یوه یوه نومره ورکړل شوه.

پاکستان له دې مخکې له نیپاله لوبه ګټلې وه او د نن ورځې له مساوي کېدو سره دویم پړاو یا سیمي فاینل ته یې لاره پیدا کړه.

د کرکټ اسیایي شورا معلوماتو له مخې، د دې سیالیو څلور لوبې په پاکستان او پاتې نورې په سریلانکا کې ترسره کېږي. په دې سیالیو کې افغانستان، پاکستان، هندوستان، سریلانکا، بنګله‌دېش او د نیپال لوبډلې برخه لري.

دغه هېوادونه پر دوو ګروپونو وېشل شوي؛ پاکستان، هند او نیپال په الف او افغانستان بنګله‌دېش او سریلانکا په ب ګروپونو کې دي.

ټاکل شوې وه د کرکټ اسیایي جام سیالۍ د پاکستان په کوربه‌توب ترسره شي خو د هند له دې پرېکړې وروسته چې پاکستان ته نه ځي، اسیایي شورا اعلان وکړي چې د دغه جام ځینې لوبې سریلانکا کې وشي.

د کرکټ اسیایي شورا معلوماتو له مخې، د هر ګروپ دوه غوره لوبډلې دویمې مرحلې یا سیمي فاینل ته ځي او بیا له هغو دوه لوبډلې پایلوبې ته لاره پیدا کوي.

د افغانستان لومړۍ لوبه د راروانې یکشنبې ورځ له بنګله‌دېش او دویمه لوبه یې د سې شنبې ورځ له سري‌لانکا سره ده؛ دواړه لوبې یې په لاهور کې دي.

[/restrict]