لوګر کې له بېوزلو سره د مرستې په موخه د شاتو مچیو سل فارمونه جوړېږي

پل‎علم (پژواک، ۱۸ وږی ۱۴۰۲): د لوګر د کرنې او مالدارۍ ریاست وایي چې په دغه ولایت کې د څه باندې ١٣٦ زره امريکايي ډالرو په لګښت د شاتو مچيو د سلو فارمونو جوړولو چارې پيل شوې.

د لوګر د کرنې، اوبو لګولو او مالدارۍ ريیس مولوي سیدامین هاشمي پژواک ته وویل، د ملګرو ملتونو اړوند د «هڅې او هاند» مؤسسې په مالي ملاتړ په مرکز پل‌علم، محمداغه، بره‌کي‌برک، څرخ او خوښۍ ولسوالیو کې ۴۷ بې‌وزله مېرمنو او ۵۳ بې‌وزله نارینه وو ته د شاتو مچیو د روزنې فارمونو جوړولو چارې پيل شوې.

هاشمي زیاته کړه چې یادو کورنیو ته د ۱۳۶ زره او ۶۰۰ امریکایي ډالرو په لګښت د شاتو مچۍ او وسایل وېشل شوي او هڅه روانه ده چې دغه فارمونه ژر تر ژره په معیاري توګه فعال شي.

بلخوا د دغو کسانو له ډلې رحیم‌الله پژواک ته وویل، د کرنې رياست بايد دوى ته د شاتو مچيو پالنې، ساتنې او محصولاتو ترلاسه کولو برخو کې روزنه ورکړي.

د مرکز پل‌علم یوې اوسېدونکې بلقیس پژواک ته وویل، خاوند یې په تېرو جګړو کې مړ شوى، اقتصادي وضعيت یې سم نه دى خو اوس د کرنې رياست ورته د شاتو مچيو فارم جوړ کړى دى.

هغې هيله‌مندي وښوده چې دغه فارم به يې په راتلونکي کې تر ډېره اقتصادي ستونزې هوارې کړي.

د يادونې ده، تېره اونۍ په لغمان ولايت کې هم لسګونو کسانو ته د شاتو مچيو فارمونه جوړ شول.