ښرنه (پژواک، ۲۴ وږی ۱۴۰۲): د پکتیکا ولایت د طبیعي پېښو پروړاندې د مبارزې چمتوالي ریاست وایې چې د دغه ولایت د ګیان ولسوالۍ له زلزلهځپلو سره د هغوی د کورونو د بیارغولو او جوړولو په موخه د کډوالۍ نړۍوال سازمان (ایاواېم) له خوا څه باندې ۶۷ میلیونه افغانۍ نغدي مرسته شوې ده.
د پکتیکا د طبیعي پېښو پروړاندې د مبارزې د چمتوالي رییس مولوي مطیعالله منصور پژواک خبري آژانس ته وویل چې دا مرستې د شیلټر پروژې یوه برخه ده چې دې پروژه کې زلزله ځپلو ته د کورونو بیا رغولو لپاره په درېیو قسطونو کې نغدي پيسې ورکول کېږي.
هغه زیاتوي: «دا ځل ۱۰۷۷ کورنیو ته ۶۷،۷ میلیونه افغانۍ نغدې پیسې وېشل شوې دي چې ۶۳۶ کورنیو ته دویم او ۴۴۱ کورنیو ته د درېیم قسط پيسې ورکړل شوي دي.»
مولوي منصور زیاتوي، شاوخوا ۲۵۰۰ کورونو د بیارغولو چارې روانې دي چې په را روانو څو میاشتو کې به بشپړې شي او همدومره شمېر زلزله ځپلې خلک به ودان کورونه ولري.
د ګیان ولسوالۍ اوسېدونکي د دغو کورونو رغولو ته خوښ دي چې ډېر شمېر نړېدلي کورونه بېرته ودانېږي.
د ګیان یو قومي مشر مولوي منور پژواک خبري اژانس ته وویل چې تېر کال زلزلې له امله زرګونه کورنۍ بې سرپناه شوې، اوس چې یو شمېر زلزلهځپلو ته بېرته کورونه رغول کېږي، خوشحاله دی.
هغه زیاته کړه: «دلته چې زلزله وشوه نو ۷ زره کورونه ونړېدل، موږ سره بیا د ډېرو موسسو لخوا مرسته وشوه خو د مهاجرینو له سازمان څخه موږ ډېره مننه کوو چې زرګونه کورونه جوړوي.»
دی زیاتوي چې د دغو کورونو په رغېدو سره به د ګیان ولسوالۍ ډېر زلزلهځپلې ارام او هوسا ژوند ولري خو په خبره یې چې لا هم داسې زلزلهځپلې خلک شته چې سرپناه نه لري.
د یادولو ده چې میاشت وړاندې د ترکیې سرې میاشتې لخوا هم په ګیان کې زلزلهځپلو ته ۶۵ کورونه جوړ او ګټې اخیستنې ته وسپارل شول.
تېر کال د پکتیکا ولایت په برمل، ګیان او زېړوک ولسوالۍ کې سخته زلزله وشوه چې له امله یې ۱۲ زره کورونه ویجاړ او ۱۵۰۰ کسانو ته مرګ ژوبله واوښته.
غړيYou need to subscribe to view the full article. Please login or register a new account.
