ندیم: د استادانو د دعوت لپاره مو بهر ته پلاوي استولي

مزارشریف (پژواک، ۲ تله ۱۴۰۲): د لوړو زده‌کړو سرپرست وزیر وایي، بېلابېلو هېوادونو ته یې پلاوي استولي څو تللي افغان استادان بېرته هېواد ته رادعوت کړي.

د لوړو زده‌کړو سرپرست وزیر ندامحمد ندیم دغه څرګندونې بلخ ولایت ته د سفر پر مهال د دغه ولایت چارواکو، د پوهنتون استادانو او محصلینو ته په ګډه غونډه کې وکړې.

ندیم وویل: «مختلف پلاوي مو بېلابېلو هېوادونو ته استولي څو هغه افغان استادان چې له هېواده بهر تللي، بېرته هېواد ته رادعوت کړي.»

هغه زیاته کړه، غواړي له بهرنیو هېوادونو یو شمېر استادان بېرته هېواد ته راغواړي څو د محصلینو د زده‌کړو او استادانو ظرفیت لوړونې برخو کې کار وکړي.

دغه راز ندیم پوهنتونونو کې د لابرتوار شتون مهم ګڼي او وایي چې سږ کال یې په پوهنتونونو کې د لابرتوارونو فعالولو په موخه ۲۵۰ میلیونه افغانۍ ځانګړې کړې څو محصلین د تیوریکي زده‌کړو ترڅنګ عملي زده‌کړې هم وکړي.

نوموړي دغه راز د استادانو د ظرفیت پر لوړېدو ټینګار وکړ، ويې ویل چې سږ کال دغه وزارت ۴۵۰ میلیونه افغانۍ د استادانو ظرفیت لوړونې ته هم ځانګړې کړې دي څو یو شمېر استادان بهر ته د ماسټرۍ او دوکتورا لپاره هم ولاړ شي.

ندیم دغه راز په خپلو خبرو کې له پوهنتونونو فارغو محصلینو ته د کاري فرصتونو برابرولو ډاډ هم ورکړ او ویي ویل چې په دې اړه یې له یو شمېر وزارتونو سره خبرې کړې دي.

په همدې حال کې د بلخ پوهنتون رییس ضیاوالحق ضیا کریمي بیا وایي، هغه استادان چې بهر ته تللي او د ګوتو په شمېر دي، هغوی دغه هېواد، ولس او نظام ته ژمن نه وو نو ځکه یې هېواد پرېښوده.

هغه زیاتوي چې د هېواد دننه پاتې ټول استادان نظام، هېواد او ولس ته ژمن دي او په ښه توګه خدمت کوي.

همدارنګه په یاده غونډه کې د استادانو به استازیتوب صالح‌محمد راسخ وویل چې د دیني مدرسو په نصاب کې دې بدلون راوستل شي.

هغه زیاته کړه، په دیني مدرسو کې باید د اسلام تاریخ، ادبیات او لیکدود تدریس شي څو دیني عالمان هم په دې اړه اړین معلومات ترلاسه کړي.

بلخوا د بلخ ولایت مقام مرستیال نورالهادي ابو ادریس د دیني علومو ترڅنګ عصري علوم هم مهم ګڼي او وایي، هغه کسان چې عصري علوم زده ‌کوي، له دې لارې خلکو او هېواد ته د خدمت جوګه ګرځي.

د لوړو زده‌کړو سرپرست وزیر په داسې حال کې بلخ ولایت ته سفر کوي چې له دې مخکې یې بامیان، فاریاب، سرپل او جوزجان ولایتونو ته هم سفر درلود او ویلي يې دي چې اسلامي امارت د عصري علومو مخالف نه دی.