<p style="text-align: justify;">کابل (پژواک، ۲ میزان ۱۴۰۲): د اوبو او برېښنا وزارت وایي، د هېواد په ۱۳ ولایتونو کې د ۴۲۰ میلیونه افغانیو په لګښت د ۱۴۰ چکډيمونو جوړولو پروژو پلې کولو چارې پيلوي چې ورسره به له وچکالۍ سره د مبارزې برخه کې اغېزناک ګام واخيستل شي.</p>
<p style="text-align: justify;">د اوبو او برېښنا وزارت په خبرپاڼه کې راغلي چې تېره ورځ د دغه وزارت سرپرست ملا عبداللطیف منصور په مشرۍ د هېواد په ۱۳ ولایتونو کې چې وچکالي ډېر زیانمن کړي، د چکډيمونو جوړولو پروژو چارو پیلېدو په موخه د همغږۍ ناسته ترسره شوه.</p>
<p style="text-align: justify;">سرچينې لیکلي چې په دې ناسته کې ټاکل شوې کمېټې ته دنده وسپارل شوه چې د یادو پروژو پلې کولو چارې دې ژر تر ژره او په غوره توګه پر مخ یوسي.</p>
<p style="text-align: justify;">د خبرپاڼې معلوماتو له مخې، په لومړي پړاو کې په هېواد کې د اوبو مدیریت د بحران، د موسمي سېلابونو د مدیریت او کنټرول، د اوبو سرچینو د پیاوړتیا او د سېلابونو او وچکالیو زیانونو د کموالي لپاره د هېواد په ۱۳ هغو ولایتونو کې د ۱۴۰ چکډيمونو جوړولو پروژو پلې کول د اوبو او برېښنا وزارت ته سپارل شوی او د دغو پروژو لګښت په فوقالعاده توګه د افغانستان اسلامي امارت له لوري منظور شوی دی.</p>
<p style="text-align: justify;">د اوبو او برېښنا وزارت لیکلي چې د دغو پروژو په پلې کولو سره به له وچکالۍ سره د مبارزې، د اوبیزو سرچینو مدیریت او پیاوړتیا برخو کې یو مثبت او اغېزناک ګام واخيستل شي او خلک به د هېواد په اکثرو برخو کې ورڅخه برخمن شي.</p>
<p style="text-align: justify;">پژواک د روان کال په چنګاښ میاشت کې یو <strong><a href="https://pajhwok.com/ps/2023/07/22/22serious-actions-are-needed-to-prevent-the-negative-effects-of-climate-change-in-afghanistan/">راپور</a> </strong>خپور کړ چې د تودوخې درجې لوړېدل، پرلهپسې وچکالي، په منځنۍ کچه د ځمکې لاندې اوبو ۱۱ متره ټیټېدل، غیرموسمي بارانونه او د سېلابونونو راوتل په افغانستان کې د خلکو بېځایه کېدو، مالدارۍ کمېدو او د زرګونه هکټاره کرنیزې ځمکې د له منځه تلو لامل ګرځېدلي دي.</p>
<p style="text-align: justify;">کارپوهانو ویلي وو، د یادو ستونزو هواري لپاره باید د نورو اقداماتو ترڅنګ د هېواد اوبه هم مدیریت شي او که دغه کار ونه شي نو خلک د اوبو کمښت له ناورین سره مخ کېږي.</p>
