<p style="text-align: justify;">پلعلم (پژواک، ۶ تله ۱۴۰۲): د لوګر ولایت د کلیو پراختیا او بیارغونې ریاست مسوولین وايي، نن د دغه ولایت په خوښۍ ولسوالۍ کې د شاوخوا ۱۸.۵ میلیون افغانیو په لګښت د ۲۰ رغنیزو پروژو چارې پيل شوې.</p>
<p style="text-align: justify;">د لوګر ولایت د کلیو پراختیا او بیارغونې رییس مولوي محمدقاسم راشد پژواک خبري اژانس ته وویل، دغه پروژې د ملګرو ملتونو د پروژو د خدمتونو دفتر(یونپس) په مالي ملاتړ د راتلوونکو درېیو میاشتو په ترڅ کې په خوښۍ ولسوالۍ کې پلي کېږي.</p>
<p style="text-align: justify;">راشد زیاته کړه، په یادو پروژو کې ۲۴ زره مترمربع د کانالونو پاکول، ۴۳۰۰ مترمربع د کاریزونو پاکول، ۹۰۰ متره د څښاک پاکو اوبو پایپ غځول او ۱۵۰ متره په اوږدوالي محافظوي دېوال جوړول شامل دي.</p>
<p style="text-align: justify;">هغه دغه راز زیاته کړه، په یادو پروژو کې به شاوخوا ۱۱۰۰ وزګارو مسلکي او غیرمسلکي کسانو ته د درېیو میاشتو لپاره د کار زمینه برابره شي.</p>
<p style="text-align: justify;">بلخوا د دغه ولایت والي مولوي ضیاالرحمن مدني وویل، د لوګر ولایتي اداره هڅه کوي په نورو ولسوالیو کې هم ورته پروژې پلې کړي.</p>
<p style="text-align: justify;">هغه زیاته کړه، ا.ا له ولس سره شوې ژمنې عملي کوي او د هېواد د بیارغونې برخه کې شته پلانونه پلي کړي.</p>
<p style="text-align: justify;">هغه دغه راز له ولس څخه غوښتنه وکړه چې د بیارغونې په برخه کې له دولت او مرستندویه مؤسسو سره همکاري وکړي.</p>
<p style="text-align: justify;">د لوګر ولایت د خوښۍ ولسوالۍ اوسېدونکي هم خوښ دي چې د کلیو پراختیا او بیارغونې ریاست له لوري په دغه ولسوالۍ کې ۲۰ رغنیزې پروژې پيل شوې دي.</p>
<p style="text-align: justify;">د خوښۍ ولسوالۍ یوه اوسېدونکي رسولګل وویل، خوښ دی چې په ولسوالۍ کې یې رغنیزې پروژې عملي کېږي.</p>
<p style="text-align: justify;">هغه له حکومته غوښتنه وکړه چې د تېر نظام د ولسي تړون پاتې نېمګړې پروژې هم بشپړې کړي.</p>
<p style="text-align: justify;">دا په داسې حال کې ده چې تېره ورځ هم د ملګرو ملتونو د ماشومانو ملاتړ صندوق (UNICEF) له لوري د پوهنې په برخه کې د ۲۰ میلیونه افغانیو په ارزښت د دریو رغنیزو پروژو کار پیل شو.</p>
