د بلخ سینماګران له حکومته د ملاتړ غوښتنه کوي

مزارشریف (پژواک، ۱۲ تله ۱۴۰۲): بلخ ولایت کې سینماګران وایي چې اقتصادي ستونزې یې د فعالیت پر وړاندې خنډ ګرځېدلي او له حکومته په دې برخه کې د ملاتړ غوښتنه کوي.

هغوی دغه راز وایي که حکومت یې لاسنیوی وکړي چمتو دي چې د سرپرست حکومت د اصولو له مخې په روزنیزه برخه کې ډرامې او فلمونه جوړ کړي.

په بلخ کې یو سینماګر محمدآغا چې په دې وروستیو کې یې د ګل تباهي په نوم فلم جوړ کړی، وایي چې په دغه فلم کې یې په نشه‌يي توکو د روږدي کس ژوند انځور کړی او غواړي له دې لارې ځوانانو ته د نشه‌يي توکو د نه کارولو پیغام ورسوي.

د نوموړي په وینا، دغه فلم یې شپږو میاشتو کې جوړ کړی او له خپلې شخصي بودجې یې ۱۵۰ زره افغانۍ پرې لګولي دي.

هغه وایي چې د یاد فلم د جوړولو پرمهال له ګڼو اقتصادي ستونزو سره مخ شوی او چا یې لاسنیوی هم نه دی کړی.

بلخ کې د سینما یو بل لوبغاړی عبدالصبور رسولي چې کلونه کېږي د سینما او تیاتر په برخو کې کار کوي، وایي چې تر دا مهال یې ۱۲ فلمونه جوړ او نندارې ته وړاندې کړي.

هغه زیاتوي چې په دې وروستیو کې سینماګران له ګڼو روحي او اقتصادي ستونزو سره مخ دي او له حکومته غوښتنه کوي چې لاسنیوی او ملاتړ يې وکړي.

جمشید جهان‌فر د فلمونو لیکوال او سینماګر هم وایي چې له ځینو محدودیتونو سره- سره بیا هم سینماګرانو خپل فعالیتونه روان ساتلي دي.

جهان‌فر زیاتوي چې یو شمېر سینماګرانو په کابل، بلخ او یو شمېر نورو ولایتونو کې د اقتصادي ستونزو له امله خپل مسلک پرېښی او شاقه کارونو ته یې مخه کړې.

جهان‌فر دغه راز وایي چې حکومت باید له دغو سینماګرانو د اسلامي، فرهنګي، زده‌کړې او روزنې برخو کې د ډرامو او فلمونو په جوړولو کې کار واخلي.

یو ممثل شمس‌الله بشردوست سینماګران د ټولنې دعوتګر او پیغام رسوونکي بولي، خو وایي چې افغان سینماګران له اقتصادي ستونزو مخ دي او که ملاتړ یې وشي چمتو دي چې له نړۍوالو سره په دغه برخه کې سیالي وکړي.

بلخوا د بلخ اطلاعات او فرهنګ ریاست مسوولین سینماګرانو ته د مرستې ډاډ ورکوي.

د بلخ ولایت د اطلاعاتو او فرهنګ ریاست د اطلاعاتو امر عطامحمد ساهو وایي، د اطلاعات او فرهنګ وزارت په هېواد کې د سینماګرانو د ملاتړ په موخه د لنډو فلمونو او هنري پارچو سیالۍ په لاره اچولي چې له بلخ څخه ۲۰ هنري پارچې او لنډ فلمونه ورته نوماند شوي دي.

هغه زیاتوي چې د دغه وزارت مالي برخه د سینماګرانو د ملاتړ لپاره ځانګړې بودجه نه لري خو هڅه کوي چې د دوی لاسنیوی او ملاتړ وکړي.

ساهو دغه راز له خلکو او سوداګرو غواړي چې په مالي برخه کې د سینماګرانو ملاتړ او لاسنیوی وکړي.

د دغه ریاست د معلوماتو له مخې د سرپرست حکومت له بیا واکمنیدو وروسته بلخ ولایت کې درې بېلابېل فلمونه جوړ شوي او دغه ریاست یې مخ‌کتنه کړې ده.