<p style="text-align: justify;">کابل (پژواک، ۱۵ تله ۱۴۰۲): د مالیې وزارت د درزلرونکو جستي اوسپنیزو نلونو وارداتي ګمرکي تعرفه له لس سلنې شل سلنې او د وارداتي بیټریو له پنځه سلنې اته سلنې ته لوړه کړې او چسپ لرونکې ښیښهیي پلاستیکي کڅوړو ته یې ۲۵ سلنه تعرفه ټاکلې ده.</p>
<p style="text-align: justify;">د مالیې وزارت په خبرپاڼه کې راغلي چې دغه تعرفې د وږي میاشتې په ۲۹مه ټاکل شوې وې او تېره اونۍ (د تلې اتمه) د مالیې وزارت د مقام له لوري منظور شوې دي.</p>
<p style="text-align: justify;">سرچينې لیکلي، د درزلرونکو جستي اوسپنیزو نلونو وارداتي ګمرکي تعرفه له لس سلنې ۲۰ سلنې ته او د وارداتي بیټریو ګمرکي تعرفه له پنځه سلنې اته سلنې ته لوړه شوه.</p>
<p style="text-align: justify;">د خبرپاڼې له مخې، د وچو مېوو او کالیو لپاره چسپ لرونکي ښیښهیي پلاستیکي کڅوړې چې پخوا په نورو کوډونو کې د ۵۰ سلنې تعرفې په لرلو سره محصولېدې او اوس ورته ملي کوډ جوړ او د کمرګي محصول لپاره ۲۵ سلنه تعرفه ورته وټاکل شوه.</p>
<p style="text-align: justify;">مالیې وزارت وایي، یادې نوې منظور شوې تعرفې د تلې له نهمې نېټې د هېواد په ټولو ګمرکو کې د پلې کېډو وړ دي.</p>
