پلعلم (پژواک، ۱۷ تله ۱۴۰۲): د لوګر والي د دغه ولایت د رسنیو له مسوولینو او خبریالانو سره په ګډه ناسته کې ویلي چې اطلاعاتو ته د لاسرسي برخه کې به اسانتیا رامنځته کړي.
د لوګر خبریالانو او د سیمهییزو رسنیو مسوولینو نن د یوې غونډې په ترڅ کې د دغه ولایت له والي مولوي ضیاالرحمن مدني سره ولیدل.
په دې لیدنه کې په لوګر کې د پژواک خبريال خانولي احمدزي وویل چې په دغه ولایت کې د ملکي او نظامي ادارو د ویاندویانو ظرفیت کچه باید لوړه شي، څو خبریالان او د رسنیو کارکوونکي په اسانه وتوانیږي اطلاعاتو ته لاسرسی پيدا کړي.
بلخوا، په لوګر کې د زینت خصوصي راډیو مسؤل نورالله ستانکزي وویل، د پخوا په پرتله د رسنیو برخه کې ستونزې راکمې شوي دي، خو ولایتي ادارې ته په کار ده چې د محلي رسنیو اقتصادي ستونزو هوارۍ ته لومړیتوب ورکړي.
دغه راز د لوګر د اطلاعاتو او کلتور رییس رفیعالله صمیم وویل، په دغه ولایت کې په تېرو دوو کلونو کې د خبریالانو پر وړاندې د تاوتریخوالي هيڅ پېښه نه ده ثبت شوې او مسوولین له رسنیو او خبریالانو سره ښې اړيکې لري.
په پای کې د لوګر والي مولوي ضیاالرحمن مدني وویل، رسنۍ او ژورنالېستان باید واقعیتونه نشر کړي او له بېځایه تبلیغاتو ډډه وکړي.
مدني زیاته کړه، اطلاعاتو ته د لاسرسي برخه کې شته ستونزې به حل او دغه راز د ولایتي ادارې او ژورنالېستانو ترمنځ به پیاوړې همغږي رامنځته کړي.
د معلوماتو له مخې، لوګر کې دا مهال څلور خصوصي او دوه دولتي راډیوګانې، یوه میاشتنۍ جریده او شاوخوا ۵۰ ژورنالېستان فعالیت کوي.
GET IN TOUCH
NEWSLETTER
SUGGEST A STORY
PAJHWOK MOBILE APP