اروپایي ټولنې د هرات له زلزله‌ځپلو سره درې‌نیم میلیون یورو مرسته اعلان کړه

[restrict paid="true"]

اټلانټا (پژواک، ۱۸ تله ۱۴۰۲): اروپايي ټولنه وایي، د افغانستان زلزله‌ځپلو لپاره یې د درې‌نیم میلیون یورو بشري مرستو کڅوړه تصویب کړه.

د اروپایي ټولنې له خوا د تلې په ۱۷مه خپره شوې یوه خبرپاڼه کې راغلي، د افغانستان په لوېدیځ کې د تېرې اونۍ له خونړۍ زلزلې وروسته، اروپايي ټولنه زیانمن شوو وګړو ته د بېړنیو اړتیاوو پوره کولو لپاره د بېړنۍ بشري مرستې برخه کې د ۳،۵ میلیون یورو لومړنۍ مرسته برابره کړې ده.

سرچینې زیاته کړې، دا نوې مرسته د هغې ۸۹ ميليون يورو بشردوستانه مرستې سربېره ده چې له دې مخکې په ۲۰۲۳ کال کې په هېواد کې د بشردوستانه سازمانونو لپاره ځانګړې شوې وې.

په خبرپاڼه کې راغلي، په افغانستان کې د اورپايي ټولنې بشردوستانه مرستې يوازې په سيمه کې د بشردوستانه شريکانو له لارې استول کېږي.

اورپایي ټولنې ویلي، د دې ترڅنګ په دوبۍ کې له خپلو بشري زېرمو زیانمن شوو خلکو ته د اروپا د بشردوستانه غبرګون د ظرفیت (EHRC) په چوکاټ کې غير نغدي  مرستې استوي.

د اکتوبر په اوومه په هرات ولایت د ریښتر په کچه ۶،۳ درجې زلزلې ولړزاوه او ورپسې ېې دری نور ټکانونه درلودل.

د هرات ځایي چارواکو ویلي، د زلزلې له امله دوه‌نیم زره کسان مړه او همدومره نور ژوبل شوي دي.

[/restrict]